Formannaáskorun Vísis: Óvissudrykkir, Jane Austen og dularfullur Logi Bergmann

Sigmundur Davíð Gunnlaugsson, formaður Miðflokksins, er mikið fyrir kvikmyndir sem byggja á sögum Jane Austen og var einu sinni stöðvaður af lögreglu fyrir að aka í öfuga átt á bílastæði í Keflavík. Ekki liggur fyrir hvort einhver tenging sé þar á milli. Hann eldar fiskibollur í kaffivél og hefur greinilega brallað ýmislegt með Loga Bergmann.

Þetta er brot af því sem kemur fram í svörum Sigmundar við Formannaáskorun Vísis.

Vísir leggur mikið upp úr því að umfjöllunin um Alþingiskosningarnar sé ítarleg og úr öllum áttum, líka skemmtileg. Því lögðum við fyrir alla formenn skemmtilegan spurningalista með spurningum af öllu tagi, sumar erfiðari en aðrar en allar í persónulegri kantinum. Svör fleiri formannanna hafa verið birt á undanförnum dögum og að lokum er komið að Sigmundi Davíð Gunnlaugssyni, formanni Miðflokksins.

Hver er fallegasti staðurinn á Íslandi?

Svæðið frá Siglufirði að Djúpavogi.

Varstu sumar í sveit?

Tók nokkrar helgar.

Hvaða mat ert þú best/ur í að elda?

Sérréttur minn er fiskbollur í kaffivél.

Hvernig bíl ekur þú og hefur þú gefið honum nafn?

Svartur Land Cruiser sem hefur reynst mér mjög vel í nærri 10 ár. Stundum kallaður Fagri-blakkur.

Hver er draumabíllinn?

'64 Aston Martin DB5 eða '56 Mercedes Benz 300 SL, nú eða bara Bel Air '57

Besti hrekkurinn sem þú hefur gert?

Óviðeigandi að segja frá því en fórnarlambið var Logi Bergmann Eiðsson.

Besti hrekkurinn sem þú hefur lent í?

Óviðeigandi að segja frá því en gerandinn var Logi Bergmann Eiðsson.

Hefur þú komist í kast við lögin?

Ég var einu sinni stoppaður af lögreglu fyrir að aka í öfuga átt á bílastæði í Keflavík.

Uppáhalds föstudagskvöldsdrykkur?

Öl úr Norðausturkjördæmi áður en ég var settur á sér-fæði. Nú berja- og bananadrykkur eða einhver grænn drykkur sem ég veit ekki hvað er í.

Uppáhalds bókin?

Bókin sem ég er að skrifa, hún er svakaleg.

Uppáhalds bíómynd?

Þær eru nokkrar. Nefni sérstaklega Star Wars (alvöru myndirnar) og Aftur til framtíðar.

Uppáhalds „guilty pleasure“ bíómynd?

Jane Austen myndir.

Uppáhalds tónlistarmaður?

Get ekki valið einn.

Hvað er uppáhalds pepp-lagið þitt?

Mörg góð, stór hluti 80's lög, eðlilega.

Hefur þú farið í Costco?

Já.

Hefur þú farið í H&M á Íslandi?

Nei.

Hefur þú migið í saltan sjó?

Já.

Þegar þú ferð í fríið, sólarströnd eða menning?

Menning („arkitektúr í köldum löndum“ myndi konan mín kalla það).

Uppáhalds þynnkumatur?

Þarf nú ekki oft á slíku að halda en er hamborgari ekki rétt svar?

Ananas á pizzu?

Alls ekki, fyrir því eru faglegar, vísindalegar, óháðar og gagnsæjar ástæður sem ég hef áður gert grein fyrir.

Hvaða leikari væri fengin til að leika þig í bíómynd?

Erlendur leikari? Einu sinni var talið að Hugh Grant gæti gert það. Svo Kenneth Branagh en ætli ég sé ekki lentur í John Goodman.

Hvaða hreyfing er í uppáhaldi hjá þér?

Miðflokkurinn.

Trúir þú á líf eftir dauðan?

Það er eins gott, annars geng ég aftur.

Hefur þú átt gæludýr?

Já, hamstra og fiska, einn snigil og nú hundinn Emmu.

Með hvaða liði heldur þú (íslensku)?

Fram og Haukum. Hvort tveggja á sér sögulegar skýringar.

Sterkasta minning úr æsku?

Þær eru enn að verða til. Stofnfundur Miðflokksins er mér enn í fersku minni svo ég nefni nú eitthvað.

Hvað er það skrítnasta sem þú hefur gert?

Ég virðist ekki vera dómbær á það. Ég hef tekið eftir því að sumt sem mér finnst skrítið þykir öðru fólki eðlilegt og sumt sem mér finnst eðlilegt þykir öðru fólki skrítið.