Elías Már kom inn í stórsigri

Elías Már Ómarsson kom inn á lokamínútum leiks Gautaborgar og Sirius í sænsku úrvalsdeildinni í fótbolta í kvöld.

Gautaborg vann leikinn 4-0 og höfðu öll mörkin verið skoruð þegar Elías Már kom inn á 87. mínútu.

Mikael Boman, Tobias Hysen, August Erlingmark og Mix Diskerud skoruðu mörk Gautaborgar sem fór með sigrinum upp í 7. sæti deildarinnar með 34 stig.

Viðar Ari Jónsson spilaði allan leikinn fyrir Brann sem steinlá fyrir Kristiansund á heimavelli í norsku úrvalsdeildinni í fótbolta.

Leiknum lauk með 0-4 sigri Kristiansund en Benjamin Stokke og Torgil Gjertsen gerðu tvö mörk hvor.

Brann er í þriðja sæti deildarinnar með 40 stig eftir 24 leiki.