Rússar auka eftirlit með þorsklifur frá Akranesi

Rússneska matvælastofnunin hefur aukið eftirlit sitt með innflutningi á framleiðsluvörum niðursuðuverksmiðjunnar Akraborgar á Akranesi. Ástæðan er sú að eitraði þungmálmurinn kadmíum fannst yfir leyfilegum mörkum í niðursoðinni íslenskri þorsklifur sem fyrirtækið seldi til Rússlands. 

Eftirlit með vörum Akraborgar var aukið þann 18. júlí síðastliðinn. Samkvæmt tilkynningu á vef rússnesku stofnunarinnar voru þrjú sýni tekin. Fyrirtækið, sem er í eigu Lýsis og er stærsti framleiðandi á niðursoðinni þorsklifur í heiminum, megi enn flytja vörur til Rússlands en með því skilyrði að sýni séu tekin úr öllum sendingum. Um tíu prósent af framleiðslu Akraborgar, rúmlega milljón dósir af lifur á ári, fara til Tollabandalags Rússlands, Hvíta-Rússlands og Kasakstans og sér matvælastofnunin rússneska um eftirlit fyrir ríkin þrjú.

„Samkvæmt því sem ég hef séð hefur þetta eitthvað með magn kadmíums að gera. Við erum að bíða eftir frekari upplýsingum,“ segir Rolf Hákon Arnarson, framkvæmdastjóri Akraborgar, í samtali við Fréttablaðið.

„Hér eru sumarfrí og við höfum því ekki náð að skoða þetta neitt frekar. Þetta er að öllum líkindum vegna einhverra snefilmælinga en það er misjafnt hvernig þetta er mælt á milli landa og hvaða útkoma kemur út úr því,“ segir Rolf.

Þorvaldur Þórðarson, framkvæmdastjóri markaðsstofu Matvælastofnunar (MAST), staðfestir að stofnuninni hafi borist erindi frá Rússlandi vegna Akraborgar. Í því komi ekkert nýtt fram umfram tilkynninguna á vef rússnesku systurstofnunarinnar.

„Þetta snýst um að þeir greina kadmíum í afurðum frá þeim. Það eru ákveðin mörk fyrir því og þetta mál er til skoðunar hjá okkur og við reynum að meta hvernig þetta lítur út,“ segir Þorvaldur. Aðspurður segir hann ekki ákveðið hvort starfsmenn Matvælastofnunar verði sendir í eftirlitsferð og sýni tekin úr vörum Akraborgar hér á landi. 

„Við munum greina niðurstöður rannsóknanna frá Rússlandi og miða þær við þau mörk sem við vinnum eftir. Svo munum við bregðast við eftir því hvernig niðurstaðan verður úr þeirri skoðun okkar.“