Íslenska karlalandsliðið í körfubolta skipað leikmönnum undir 20 ára þurfti að sætta sig við annað tapið í röð á EM í Grikklandi en Tyrkir unnu sextán stiga sigur 82-66 eftir jafnan leik framan af.



Íslenska vörnin hélt vel aftur af Tyrkjum í upphafi leiks og skiptust liðin á körfum framan af en Ísland leiddi eftir fyrsta leikhluta 14-13.



Hélt íslenska liðið áfram í Tyrkina framan af en missti tökin þegar skammt var eftir af öðrum leikhluta þegar Tyrkir náðu 17-4 kafla og tóku þrettán stiga forskot inn í hálfleikinn 39-26.



Reyndu íslensku leikmennirnir að saxa á forskot Tyrkja en náðu aldrei að ógna því og bættu Tyrkirnir við forskotið í þriðja leikhluta og leiddu 59-43 fyrir lokaleikhlutann.



Þar náði íslenska liðið aftur að halda í við Tyrkina með góðum sóknarleik en það kom of seint.



Tryggvi Hlínason og Snjólfur Marel Stefánsson voru stigahæstir í íslenska liðinu með tólf stig hvor en Tryggvi var með tvöfalda tvennu með tíu fráköst.



Ísland leikur lokaleik sinn í riðlinum gegn Svartfjallalandi á morgun en Svartfellingar hafa unnið einn og tapað einum í riðlinum til þessa.