The xx heldur tónlistarhátíð við Skógafoss

Breska indie-hljómsveitin The xx er aðalsprautan á bak við Night + Day, tónlistarhátíð sem verður haldin við Skógafoss helgina 14.-16. júlí.

Á vefsíðunni thexxnightandday.com segir að The xx sjái um listræna stjórnun hátíðarinnar sem er ætlað að hylla uppáhalds staði hljómsveitarinnar um allan heim. Þar koma saman erlendir sem og íslenskir listamenn.

„Þetta er í raun þriggja daga hátíð, hún byrjar upp úr sex leytinu á föstudeginum. Hún er vinstra megin við ána á einkalóð þar. Það eru tvö svið sem verða í gangi stitt á hvað. Þetta eru einungis 5 þúsund miðar sem fara í almenna sölu og af þeim eru 2500 bara á Íslandi og 1000 fara í fan grúppu the xx,“ segir Friðrik Ólafsson tónleikahaldari í samtali við Vísi.

Forsala fyrir aðdáendaklúbb hljómsveitarinnar hefst á morgun og hefst forsala fyrir Íslendinga á tix.is á föstudaginn og kostar miðinn 19.900 krónur.

„Hluti af ágóðanum fer í sjóð til að betrumbæta svæðið og byggja upp við Skógafoss á næstu árum,“ segir Friðrik.

„The xx valdi þetta allt sjálf. Þeir eru búnir að liggja yfir íslenskri tónlistarsenu. Þeir halda night+ day úti um allan heim á stöðum þar sem aldrei hafa verið haldnar hátíðir áður.“

Meðal þeirra sem koma fram á hátíðinni eru The xx, Högni, Earl Sweatshirt, Mr Silla og sænska söngkonan Robyn.

„Síðan getur verið að það komi annað nafn inn á næstunni. Það er ekki alveg eins stórt og The xx en á svipuðu kaliberi.“