Segja Umhverfisstofnun hafa brugðist hlutverki sínu

„Umhverfistofnun hefur brugðist hlutverki sínu við náttúru og almenning og ekki starfað samkvæmt lögum.” Þetta segir í yfirlýsingu sem stjórn Vinstri hreyfingarinnar Grænt framboð á Suðurnesjum sendi frá sér í dag um málefni mengandi stóriðju í Reykjanesbæ.

Í yfirlýsingunni segir að Umhverfisstofnun hafi brugðist hlutverki sínu gagnvart almenningi á Suðurnesjum með því að beita sér ekki til að tryggja heilnæmt umhverfi.

„UST bregst hlutverkinu sem henni er ætlað að starfa eftir, samkvæmt lögum um hollustuhætti og mengunarvarnir, með því að stöðva ekki iðnað sem veldur tjóni og hefur neikvæð áhrif á heilsufar almennings og röskun lífríkis og umhverfi.”

Þá segir að hlutverk Umhverfisstofnunar er að stuðla að velferð almennings með því að beita sér fyrir heilnæmu umhverfi. Stofnunin hafi sýnt einstakt ábyrgðarleysi gagnvart íbúum Reykjanesbæjar með því að veita starfsleyfi til tveggja kísilverksmiðja í kílómetra fjarlægð frá íbúabyggð.

„Mengandi iðjuver á Suðurnesjum bera einhliða ábyrgð á umhverfisvöktun á eigin mengun samkvæmt starfsleyfum sem UST gefur út og ber ábyrgð á. Umhverfisstofnun vinnur því gegn lagalegri skyldu sinni þar sem allt vöktunarferlið er á forræði iðjuveranna sem stöðugt senda eiturefni út í andrúmsloftið án eftirlits eða ábyrgðar.”

Að lokum segir að Vinstri hreyfingin Grænt framboð á Suðurnesjum muni berjast gegn mengandi stóriðju á Suðurnesjum til framtíðar.