Uppfærslan nýstárleg og full af húmor þó umfjöllunarefnið sé alvarlegt

„Það eru engir dauðir punktar í þessari klukkutímalöngu sýningu og leikgleðin geislar af þessum ungu nemendum,“ segir Gunnar Guðbjörnsson, skólastjóri Söngskóla Sigurðar Demetz, um óperuna Gianni Schicchi eftir Gioacomo Puccini sem óperudeild skólans mun sýna í Tjarnarbíói á fimmtudagskvöld.

Gamanóperan fjallar um erfðamál og græðgi Buoso fjölskyldunnar þar sem moldríkur ættfaðirinn hefur látist og fjölskyldan hefur heyrt orðróm að hann ætli sér að láta klaustri í nágrenninu eftir allar sínar eigur. Fjölskyldan leitar erfðarskránnar og kemst að því að orðrómurinn er réttur. Nú eru góð ráð dýr en Rinuccio, einn af skyldmennum hins látna, stingur upp á að leitað verði til Gianni Schicchi sem er þekktur fyrir að vera slóttugur og eftir langt þref mætir Schicchi á staðinn og upphefst mikið sjónarspil.

Gunnar segir uppfærsluna vera nýstárlega og fulla af húmor þó umfjöllunarefnið sé alvarlegt eins og rifrildi um arf geta orðið. „Það er mikil kaldhæðni í þessari sýningu sem segja má að sé uppfærð yfir á okkar tíma, en líka mikill gáski og stundum gleði, þó hún reynist Buoso fjölskyldunni aðeins skammgóður vermir,“ segir Gunnar.

Í fréttatilkynningu frá skólanum kemur fram að uppsetning óperunnar sé mikilvægur liður í starfi skólans og endurspegli nútímaleg túlkun leikstjórans þá þjálfun sem skólinn leitast við að veita nemendum sínum.

„Gianni Schicchi er eitt af lykilverkum Puccinis og verður óperan flutt á ítölsku en verður íslenskum texta varpað á skjá.

Leikstjóri sýningarinnar er Bjarni Thor Kristinsson og hefur Antonía Hevesi verið æfingastjóri tónlistarinnar en hún leikur á báðum sýningum á slaghörpuna. Elsa Waage hefur séð um ítölskuþjálfun og Jóhann Bjarni Pálmason um lýsingu.

Miðasala fer fram á midi.is en einnig er hægt að kaupa miða við innganginn á undan sýningunum á fimmtudagskvöld,“ segir í tilkynningunni en tvær sýningar verða í boði, sú fyrri klukkan 19:30 og sú síðari klukkan 21.