Breytt ásýnd sérsveitarinnar

Breyting verður á ásýnd sérsveitar Ríkislögreglustjóra með nýjum bílum og nýjum einkennisfatnaði sem tekinn hefur verið í notkun. Með breytingunum verða sérsveitarmenn auðþekkjanlegri í störfum sínum á vettvangi.

Með nýjum búnaði er sérsveit Ríkislögreglustjóra að efla tækjakost sinn frá stofnun sveitarinnar hafa þeir sinnt daglegu á merktum lögreglubílum en nú verður hins vegar breyting á. Nýju bílarnir verða ómerktir en búnir öllum þeim tækjabúnaði sem sérsveitin þarf til daglegra starfa.

Nýju bílarnir verða fjórir eru af gerðinni Ford Police Interceptor, árgerð 2017, sérframleiddur fyrir löggæslulið en þessi tegund hefur verið afar vinsæl til að mynda hjá lögregluliðum í Bandaríkjunum. Bíllinn er öflugur eða um 400 hestöfl, búinn öflugu rafkerfi, bremsur eru sérstyrktar og hurðar eru skotheldar.

Ástæða þess að bílarnir verða ómerktir er vegna þeirra fjölbreyttu verkefna sem sérsveitin sinnir eins og lífvarðagæslu þegar þjóðhöfðingjar sækja Ísland heim en áður hafa bílar verið leigðir í þau verkefni.

„Þetta ferli hófst fyrir tveimur árum, að skoða þennan möguleika á þessum kaupum og það þýddi að fara út og skoða þetta þar,“ segir Ásmundur Kr. Ásmundsson, aðalvarðstjóri sérsveitar Ríkislögreglustjóra.

Bílarnir eru fyrstu sérbúnu lögreglubílarnir sem sérsveitin hefur fengið til afnota og leysa af hólmi eldri bíla sem teknir voru í notkun árið 2011.

Bílarnir kosta hver um sig tæpar fimmtán milljónir króna og segir Ásmundur bílana ódýrari en þá sem teknir verða úr notkun. 

Eðli starfsins vegna eru bílar sérsveitarinnar nokkuð frábrugðnir almennum lögreglubílum og búnir öflugum búnaði. 

„Persónulegur búnaður sem geymdur er í tösku, og svo er skotheldur skjöldur og stóri lykillinn sem við köllum til að opna. Svo erum við með sjúkrabúnað, mjög fullkominn sjúkrabúnað. Súrefni og hjartastuðtæki og hérna undir er svo meiri búnaður eins og slökkvitæki, naglamottur og annað sem menn nota,“ segir Ásmundur.

Í bílnum er sérsmíðaður vopnaskápur fyrir byssur sérsveitarmanna. „Við erum með Glock skammbyssur og svo erum við með þýskar MP5-vélbyssur og þær eru geymdar þarna,“ segir Ásmundur.

Þið eruð alltaf vopnaðir í ykkar daglegu störfum? 

„Já. Þetta er útkallsbíll og þeir sem keyra um á honum þeir eru alltaf með þennan búnað,“ segir Ásmundur. 

Og vegna starfsins eru bílarnir búnir öflugu myndavélakerfi. Bílarnir eru ekki eina breyting en einkennisfatnaður sérsveitarmanna breytist líka.

„Við erum að sameina svokallaðan vinnugalla sem menn hafa verið í dagsdaglega og við erum að sameina aðgerðargalla í eitt „uniform“. Grái liturinn kemur til vegna þess að hann er talinn heppilegur fyrir okkar starfsemi,“ segir Ásmundur.