Spunafestival haldið í fyrsta sinn á Íslandi

Þetta er alveg frábært, við fáum fullt af frábærum hópum frá öllum heimshornum og dagskráin er þéttskipuð,“ segir Dóra Jóhannsdóttir, leikkona og listrænn stjórnandi hátíðarinnar og Improv Íslands.

Dóra lærði spunatækni í Upright Citizens Brigade í New York í þrjú ár en frá því hún stofnaði Improv Ísland er óhætt að segja að áhugi fyrir spuna hafi aukist töluvert á Íslandi.

„Ég byrjaði með Improv Ísland hópinn fyrir tveimur árum síðan, við höfum reglulega fengið gestakennara til landsins sem hefur vakið mikla lukku. Það var komin hálfgerð pressa á að fara að halda almennilegt festival svo við létum bara verða af því og hingað eru komnir átta frábærir spunahópar,“ segir Dóra.

Hóparnir koma frá Bandaríkjunum, Bretlandi, Frakklandi og Svíþjóð og óhætt er að segja að fram undan sé spunaveisla, þar sem meðal annars færustu spunaleikarar Bandaríkjanna koma fram.

„Þetta eru mjög skemmtilegir hópar og þetta verður frábær skemmtun. Við ljúkum svo hátíðinni á Græna herberginu með svokölluðu Indie Show, þar sem öllum sjálfstæðum spunahópum er velkomið að sýna,“ segir Dóra.

Spunasýningarnar verða margs konar, hiphop-söngleikur, kabarett-sóló, spunnin verður hasarbíómynd og ein spunasýningin gerist í dómsal þar sem áhorfendur lenda í hlutverki kviðdómenda svo að einhver dæmi séu tekin. Hátíðin er opin öllum og fara sýningarnar meðal annars fram í Þjóðleikhúskjallaranum, Kassanum og í Græna herberginu.

„Passinn á hátíðina kostar 5.900 krónur en hægt verður að koma og kaupa sig inn á stakt kvöld við innganginn,“ segir Dóra og hvetur sem flesta til að mæta og láta ekki þessa frábæru skemmtun fram hjá sér fara.

Fyrr í vikunni bárust þær fréttir að Improv Island spunahópnum væri boðið á Del Close spuna-maraþonið, stærsta spunafestival í heimi. Hópurinn hefur áður farið og sýndi þá rétt á undan grínistanum og stórleikkonunni Amy Poehler, en hún er einmitt einn af stofnendum maraþonsins.

„Þetta eru alveg frábærar fréttir fyrir okkur. Það eru mörg þúsund hópar sem sækja um, en aðeins um 700 hópar sem taka þátt í festivalinu, þetta er algjörlega frábært, sýndar eru sýningar í níu leikhúsum í New York, í 72 klukkutíma samfleytt,“ segir Dóra og bætir við að meðal þeirra sem sýnt hafa á hátíðinni séu Amy Poehler, Ellie Kemper, höfundar Inside Amy Schumer, Broad City, 30 Rock og fleiri af helstu grínistum Bandaríkjanna.