Vesturleiðin opnaðist í dag

Vesturleiðin milli Ísafjarðar og Reykjavíkur, um sunnanverða Vestfirði, opnaðist um hádegisbil í dag þegar vegagerðarmenn luku við að ryðja Dynjandisheiði. Áður hafði Hrafnseyrarheiði opnast í gærmorgun.

Óvanalegt er að þessar torfærustu heiðar Vestfjarðavegar opnist í marsmánuði. Guðmundur Björgvinsson, yfirverkstjóri Vegagerðarinnar á Ísafirði, segir þær venjulega opnast á milli 15. og 20. apríl. Þetta sé um þremur vikum fyrr í ár.

Lítill snjór reyndist vera á Dynjandisheiði. Hrafnseyrarheiði var sömuleiðis snjólítil sunnanmegin í Skipadal, þar sem oft hefur verið mesta snjóstálið. Talsverður snjór var hinsvegar norðanmegin í Hrafnseyrarheiði þar sem ekið er upp úr Brekkudal í Dýrafirði.

Opnun heiðanna þýðir að vegalengdir styttast verulega milli byggða á sunnan- og norðanverðum Vestfjörðum. Það hefur til dæmis afgerandi þýðingu fyrir starfsmenn fiskeldisfyrirtækja, eins og Arctic Fish. Leiðin milli starfsstöðva fyrirtæksins í Dýrafirði og Tálknafirði er um 520 kílómetrar um Djúpveg með heiðarnar lokaðar. Leiðin styttist niður í 110 kílómetra þegar þær opnuðust í dag.