Þúsundir án skilríkja

Níutíu starfsmenn í útlendingadeild norsku lögreglunnar eru í fullri vinnu við að kanna ríkisfang hælisleitenda og persónuskilríki, að því er greint er frá á vef Aftenposten.

Árið 2015 komu yfir 30 þúsund hælisleitendur til Noregs en í fyrra var fjöldinn 3.460. Aðeins 10 prósent þeirra sem sækja um hæli í Noregi framvísa vegabréfi við hælis­umsókn sína. Innan við helmingur þeirra sem komu 2015 framvísuðu einhverri tegund persónuskilríkja.

Bent var á það í skýrslu frá lögreglunni í fyrra að allt að 27 þúsund einstaklingar gætu verið rangt skráðir. Árið 2015 komst útlendingadeildin að því að 767 væru með fölsuð skilríki.

Yfir 5.000 hælisleitenda hurfu frá móttökustöðum í fyrra. Yfirvöld íhuga nú rafrænt eftirlit með hælisleitendum. 

Fréttin birtist fyrst í Fréttablaðinu