Sendi afsökunarbeiðni til óléttrar eiginkonu sinnar og barna vegna framhjáhalds

Bandaríski leikarinn Kevin Hart sendi í gær frá sér afsökunarbeiðni til óléttrar eiginkonu sinnar og tveggja barna í kjölfar þess að fregnir bárust af meintu framhjáhaldi hans. Í myndskeiði sem Hart birti á Instagram síðu sinni segist hann hafa sýnt af sér slæma dómgreind og biðst innilegrar afsökunar á gjörðum sínum.

Hinn 38 ára gamli Hart er einn vinsælasti grínleikari heims en hann hefur leikið í myndum á borð við Ride Along, The Wedding Ringer og Get Hard. Hann hefur verið kvæntur Eniko Parrish frá árinu 2016 en í maí tilkynntu hjónakornin að þau ættu von á sínu fyrsta barni. Þá á Hart tvö börn frá fyrra hjónabandi þau Heaven og Hendrix Hart.

Afsökunarbeiðnin kemur í kjölfar þess að nokkrum myndskeiðum af Hart og annarri konu var lekið á netið að því er fram kemur á E Online. Ekki er um kynlífsmyndbönd að ræða en Hart og konan eiga þó að hafa verið ansi innileg hvort við annað.  Á konan að hafa tekið umrædd myndskeið upp.

„Ég kom sjálfum mér í aðstæður þar sem aðeins slæmir hlutir geta gerst, og þeir gerðust. Með því að gera það þá vissi ég að ég myndi særa þá sem standa mér næst, eiginkonu mína og börnin mín,“ sagði Hart dapur í bragði.   

Þá á konan að hafa reynt að kúga út úr honum fé vegna myndskeiðanna en hann segist ekki hafa viljað ganga að því.  

„Ég ætla ekki að leyfa öðrum að hagnast fjárhagslega á mínum mistökum.“

Þetta er ekki í fyrsta skipti sem umræða um meint framhjáhald Hart kemst í heimspressuna en í júlí síðastliðnum fór af stað orðrómur um framhjáhald kappans eftir að myndir birtust af honum og óþekktri konu saman í bíl. Hart gerði þó lítið úr þeim orðrómi og þvertók fyrir að um framhjáhald hefði verið að ræða. 

Sending so many apologies to my wife & kids. I gotta do better and I will. I'm not perfect and have never claimed to be ...I love you all.

A post shared by Kevin Hart (@kevinhart4real) on Sep 16, 2017 at 4:07pm PDT