Víkingarnir hans Loga í miklum vandræðum með Akureyrarliðin fyrir 25 árum

Logi Ólafsson stýrir Víkingum í fyrsta sinn í tæp 25 ár í dag þegar Víkingur Reykjavík heimsækir KA í fimmtu umferð Pepsi-deildar karla.

Leikurinn er opnunarleikur fimmtu umferðarinnar og verður sýndur beint á Stöð 2 Sport klukkan 14.00 í dag.

Logi tók við Víkingsliðinu í vikunni en þar fékk hann einmitt sitt fyrsta tækifæri sem þjálfari meistaraflokks karla frá 1990 til 1992.

Logi Ólafsson stýrði Víkingsliðinu síðast sumarið 1992 þegar liðið endaði í sjöunda sæti og rétt slapp við fall.  

Víkingar björguðu sér þá með 3-1 sigur á Blikum í lokaumferðinni. Markvörður Blika í síðasta leik Loga með Víkinga var einmitt Hajrudin Cardaklija, sem er annar aðstoðarmanna hans í dag.

Það að Logi skuli byrja á móti Akureyrarliðið beinir sjónum að leikjum Víkinga við Akureyrarliðin Þór og KA á þessu sumri fyrir 25 árum síðan.

Víkingarnir hans Loga voru nefnilega í miklum vandræðum með Akureyrarliðin í Samskipadeildinni sumarið 1992.

KA endaði í neðsta sæti þetta sumar en tveir af þremur sigurleikjum liðsins komu einmitt á móti lærsveinum Loga í Víkingsliðinu. Uppskera Víkinga á móti Akureyrarliðunum sumarið 1992 voru 0 stig í 4 leikjum. Víkingar voru aftur á móti með 5 sigra og 5 töp á móti hinum liðunum í deildinni þetta sumar.

Hér fyrir neðan má sjá svart á hvítu þessi miklu vandræði Víkinga með norðanliðin þegar Logi réði síðast ríkjum í Víkinni fyrir aldarfjórðungi síðan.



Leikir Víkinga við Akureyrarliðin sumarið 1992:

Víkin, 24. maí 1992 (1. umferð)

Víkingur - KA 0-2

Akureyrarvöllur, 20. júní 1992 (5. umferð)

Þór - Víkingur 3-0

Akureyrarvöllur, 17. júlí 1992 (10. umferð)

KA - Víkingur 1-0

Víkin, 16. ágúst 1992 (14. umferð)

Víkingur - Þór 1-4



Samanlagt hjá Víkingi á móti Akureyrarliðunum í Samskipadeildinni 1992:

4 leikir

0 sigrar

4 töp

1 mark skorað (Helgi Sigurðsson úr víti)

10 mörk fengin á sig