Búist við töfum á umferð á Kringlumýrarbraut næstu daga

Búist er við umferðartöfum á Kringlumýrarbraut næstu daga vegna framkvæmda sem þar eru að hefjast.

Framkvæmdirnar munu standa dagana 12. til 26. september þar sem til stendur að endurnýja stofnlögn kalds vatns frá lokahúsi við Stigahlíð og yfir Kringlumýrarbraut.

Í tilkynningu frá Veitum segir að hafist verði handa í fyrramálið. „Á meðan á framkvæmdum stendur verður verulega þrengt að umferð en þó verða ætíð opnar akreinar í báðar áttir. Er ökumönnum á þessari leið bent á að gera ráð fyrir auknum ferðatíma og fara aðrar leiðir sé þess kostur,“ segir í tilkynningunni.