Lömdu hetjurnar sínar eftir svekkjandi tap

Svo svekktir voru stuðningsmenn Legia Varsjá með tap sinna manna gegn Lech Poznan um nýliðna helgi að þeir gengu á skrokk á hetjunum sínum eftir leikinn.

Poznan pakkaði Legia saman, 3-0, og það var meira en hörðustu stuðningsmenn Legia gátu látið bjóða sér.

Samkvæmt pólskum fjölmiðlum biðu um 50 stuðningsmenn Legia eftir leikmönnum út á bílastæði eftir leikinn.

Leiðtogi hópsins ruddist síðan upp í rútu liðsins og krafðist þess að leikmenn stigu út úr rútunni. Leikmenn urðu við þeirra bón og bjuggust við því að lenda í samræðum um svekkjandi tap.

Það var ekki alveg svo því stuðningsmennirnir ruku í þá um leið og þeir komu út og lömdu þá. Þeir vöruðu síðan leikmenn við því að ef þeir myndu aftur spila svona illa þá yrðu þeir aftur lamdir.