Jón Gnarr ánægður með Skaupið og ýjar að frekari endurkomu Fóstbræðra

Fóstbræður áttu endurkomu í Áramótaskaupinu á gamlárskvöld en Jón Gnarr var í leikstjórastólnum. Jón segir í samtali við fréttastofu að hann sé ánægður með Skaupið.

„Ég er bara glaður og ánægður hvað fólk virðist almennt ánægt með þetta.“

Jón kveðst ekki hafa haft miklar áhyggjur af því að grínið myndi missa marks hjá þeim sem ekki þekkja Fóstbræður vel.

„En auðvitað voru ákveðnar tilvísanir sem gera það að verkum að maður verður að hafa séð Fóstbræður og vita hvers er verið að vísa til. En ég hafði ekki sérstakar áhyggjur enda er þetta eitthvað sem ég held að meirihluti fólks ætti að þekkja,“ segir Jón.

Skellihlógu við tökur á Bílastæðavörðunum

Jón segir að það hafi verið bráðskemmtilegt að vinna aftur með félögum sínum í Fóstbræðrum og að hópurinn hafi skemmt sér konunglega við tökurnar. Allir leikararnir úr Fóstbræðraþáttunum voru í hlutverkum í Skaupinu í ár.

Kunnuglegar persónur sneru aftur á skjáinn, til dæmis dúettinn Plató, Bílastæðaverðirnir, persónulegi trúbadorinn Helgi og Indriði.

„Þegar við vorum að taka upp Bílastæðaverðina, þá hlógum við svo mikið að það truflaði tökur,“ segir Jón.

Jón segir að persónurnar hafi sumar hverjar breyst nokkuð frá því að þeim voru gerð skil í Fóstbræðrum. Til dæmis hefðu Bílastæðaverðirnir verið í nýjum einkennisbúningum. Áður voru verðirnir í hátíðarbúningum en þeir fundust ekki þegar tökur hófust á Skaupinu.

„Hins vegar héldum við hárkollunum og glossinu,“ segir Jón.

Að sama skapi eru persónurnar orðnar eldri.

„Við höfum náttúrulega elst og karakterarnir líka. Mér fannst það almennt koma vel út. Indriði er til dæmis óræður í aldri, það er í raun ómögulegt að vita hvað hann er gamall,“ segir Jón.

Skemmtilegra að leikstýra en að leika

Jón segir að það sem honum hafi þótt standa upp úr við gerð Skaupsins væri frábær árangur leikaranna.

„Mér fannst allir leikararnir fara langt fram úr væntingum, þeir voru allir frábærir.“

Aðspurður um hvaða grín hafi verið í uppáhaldi hjá sér nefnir hann atriðin þar sem gert var grín að veitingastaðnum Texasborgurum og Brúneggjum.

„Ég persónulega hafði rosalega gaman af þeim,“ segir Jón. 

Jón kann vel við sig í leikstjórastólnum og segist vera vaxandi leikstjóri.

„Mér finnst mjög gaman að leikstýra, eiginlega skemmtilegra en að leika. Ég er búinn að prófa svo margt í leiklistinni og er svolítið fullnægður þar,“ segir hann.

Útilokar ekki endurkomu fóstbræðra

Jón útilokar ekki að Fóstbræður muni eiga frekari endurkomu í sjónvarp. Hann segir að slíkt hafi raunar verið til umræðu árið 2009 en svo rann það út í sandinn eftir að Jón stofnaði Besta flokkinn.

Hann segir að reynslan eftir Skaupið sé hvatning til þess að vinna meira með Fóstbræður.

„Það er alveg til í dæminu að við gerum eitthvað meira. Ég held að það sé mikil stemmning fyrir því hjá okkur. Ég held það sé tilfinning allra.“