Kári bjartsýnn-klínískar tilraunir hefjast um mitt ár

Kári Stefánsson, forstjóri Íslenskrar erfðagreiningar, er mjög bjartsýnn á þróun lyfja gegn Alzheimer. „Ég held því fram að það séu yfirgnæfandi líkur á því að lyf sem hemja framgang sjúkdómsins verði til. Eina spurningin er sú hvort það sé hægt að þróa þau þannig að þau hafi ekki miklar aukaverkanir. Núna um mitt ár hefjast klínískar tilraunir,“ segir Kári frá.

Í samstarfi ÍE og öldrunarlækna á Landspítalanum, Jóns Snædal, Pálma V. Jónssonar og Sigurbjörns Björnssonar, hefur á þriðja þúsund Alzheimer-sjúklinga tekið þátt í rannsóknum á erfðum sjúkdómsins.

Sjá einnig: Horfir í gin úlfsins

Árið 2011 birtu vísindamenn ÍE og samstarfsmenn þeirra niðurstöður úr fjölþjóðarannsókn sem benti á nokkrar algengar breytingar á erfðaefni sem eru tengdar aukinni áhættu á Alzheimer og beindu athyglinni að lífefnaferlum sem gætu verið lyfjamörk.

Árið 2012 skýrðu vísindamenn ÍE síðan frá rannsókn þar sem þeir fundu stökkbreytingu sem verndaði gegn sjúkdómnum. Einstaklingar sem bera hana eru fimm sinnum ólíklegri en einstaklingar úr viðmiðunarhópi til að greinast með Alzheimer.

„Þessi stökkbreyting sem við fundum er sterk röksemd fyrir því að þetta sé rétt aðferð. Mér er málið auðvitað skylt af því ég tók þátt í þessari uppgötvun. Ég er ekki óháður einstaklingur, en mér finnst þetta mjög spennandi hið minnsta,“ segir Kári.