Buðu í Cavani, Benzema og Falcao og höfðu áhuga á Costa

Eigandi kínverska úrvalsdeildarfélagsins Tianjin Quanjian segir að félagið hafi ætlað sér stóra hluti á leikmannamarkaðnum en að nýjar reglur um erlenda leikmenn þar í landi hafi sett strik í reikninginn.

Fyrr í vikunni voru kynntar breytingar sem taka mið af því að fækka erlendum leikmönnum í kínversku deildinni og draga úr mikilli eyðslu félaga í erlendar stórstjörnur.

Fjölmörk þekkt nöfn úr knattspyrnuheiminum hafa lagt leið sína til Kína síðustu mánuði og ár. Meðal þeirra sem hafa ákveðið að flytja sig til Kína að undanförnu eru Carlos Tevez, Oscar, Hulk, Ramires, Alex Teixeira, Graziano Pelle, John Obi Mikel og Axel Witsel.

Tevez varð á dögunum launahæsti knattspyrnumaður heims þegar hann samdi við Shanghai Shenhua.

Fækkað um tvo erlenda leikmenn

Eins og fjallað hefur verið um ítarlega í enskum miðlum síðustu daga virðist Diego Costa, sóknarmaður Chelsea, vera ósáttur í herbúðum enska liðsins og er sagður vilja komast til Kína.

En svo virðist sem að það sé ólíklegt úr þessu, ekki síst út af nýju reglunum. Samkvæmt nýju reglunum mega félög aðeins vera með þrjá erlenda leikmenn í liðinu. Áður máttu félögin vera með fimm leikmenn í leikmannahópi sínum, þar af einn frá öðru Asíulandi.

Enn fremur er liðum skylt að vera með tvo kínverska leikmenn sem eru 23 ára eða yngri í hópnum, þar af einn í byrjunarliðinu.

Þá er enn fremur ætlun knattspyrnuyfirvalda í Kína að taka á greiðslum félaganna til leikmanna, ýmist við undirritun eða á meðan samningstímanum stendur.

Costa var orðaður við Tianjin Quanjian, sem var sagt reiðubúið að borga honum meira en fjóra milljarða í árslaun - tvöfalt meira en félagið borgar Axel Witsel sem gekk í raðir þess fyrir skömmu.

Eigandi félagsins, milljarðamæringurinn Shi Yuhui, segir að nýju reglurnar hafi sett strik í reikninginn og að félagið verði að endurskoða leikmannamál sín.

Gerðu tilboð í stórstjörnur

Shu sagði meðal annars að félagið hefði áhuga á Costa, auk þess sem að það hafi lagt fram tilboð í Edenson Cavani, sóknarmann PSG í Frakklandi.

Hins vegar hafi félög þeirra ekki viljað missa þá á miðju tímabili. „Við höfum ekki efni á því að bíða hálft tímabilið,“ sagði Shu.

Shu sagði enn fremur að félagið hafi náð samningum við Radamel Falcao, sóknarmann Monaco, og Raul Jimenez hjá Benfica áður en reglubreytingin var gerð.

„Við höfum reynt að ná í marga sóknarmenn. Við gerðum tilboð í [Karim] Benzema [hjá Real Madrid] en með þessar breytingar þýða að við erum hjálparlausir.“

Þess má geta að Tianjin er nýliði í kínversku deildinni en stjóri liðsins er Fabio Cannavaro, fyrrum landsliðsfyrirliði Ítalíu.