Salek-samstarfið sett á ís

Salek hópurinn, sem hefur haft formlegt samstarf í þrjú ár um bætta kjarasamningagerð, tók ákvörðun í morgun um að frekara samstarf verði ekki fyrr en niðurstaða liggi fyrir varðandi jöfnun lífeyrisréttinda.

SALEK er skammstöfun fyrir samstarf um launaupplýsingar og efnahagsforsendur kjarasamninga. Samstarfið er á milli stórs hluta vinnumarkaðsins, hins almenna og hins opinbera, og er ætlað að stuðla að friði á vinnumarkaði og auknum stöðugleika. Hið nýja samningalíkan era ð norrænni fyrirmynd og hefur verið stefnt að upptöku þess fyrir árið 2019.

Ein forsenda fyrir friði á vinnumarkaði hefur verið að jafna lífeyrisréttindi almennra og opinberra starfsmanna en tilraunir til slíks hafa ekki tekist.

„Hópurinn kom saman í morgun í fyrsta skipti eftir að það lá fyrir að samkomulagið væri ekki í höfn. Þá var þessi umræða tekin upp og það er kalt mat hópsins að það sé betra að setja þessa vinnu á ís,“ segir Bryndís Hlöðversdóttir, ríkissáttasemjari og bætir við að allir í hópnum hafi verið sammála um ákvörðunina.

Gylfi Arnbjörnsson forseti ASÍ segir ljóst að sátt náist ekki fyrir þessar kosningar enda hafi ríkisstjórnin afturkallað frumvarp um lífeyrisréttindi.

„En á sama fundi ákveður ríkisstjórnin að hækka lífeyrisaldur okkar hinna, almennings, í gegnum almannatryggingakerfið. Það á að herða þar á, gera það á tólf árum í stað 24 ára. Það gengur ekki upp að okkar mati, að binda meginþorra launamanna við þetta en slá skjaldborg um aðra. Það er ójafnræði í því og því ekki grundvöllur um sátt.“

Gylfi segir þó ekki útséð með samstarf í framtíðinni en að boltinn sé hjá næstu ríkisstjórn. Aftur á móti sé bæði alvarlegt og dapurlegt að samstarfið hafi nú verið sett á ís.

„Það er ljóst að ef þetta fer svona fram þá megum við búast við því að það verði meiri ágreiningur og væntanlega þá átök á vinnumarkaði. Málið er því grafalvarlegt,“ segir Gylfi.