Formaður Félags heyrnarlausra: Félagið hefur aldrei og mun aldrei standa fyrir svona söfnunum

Óprúttnir aðilar, sem þykjast heyrnarlausir, hafa undanfarna daga gengið á milli fólks í verslunarmiðstöðvum og á milli húsa og reynt að hafa af því fé. Nokkrir einstaklingar hafa þegar afhent þessum aðilum peninga og málið komið á borð lögreglu.

Daði Hreinsson, formaður Félags heyrnarlausra, segist harma þetta, og segir félagið ekki standa að fjáröflunum með þessum hætti.

„Félagið harmar þetta mjög. Við höfum orðið vör við þetta fólk, en það tengist ekkert okkar félagsmönnum og þá teljum við þá heldur ekki heyrnarlausa,” segir Daði. Hann segist telja að um sé að ræða útlendinga.

„Þeir hafa komið hingað til lands á eigin vegum. Ég veit þetta því ég fór í bæjarferð sjálfur í síðustu viku til þess að athuga þetta og sá þetta fólk, og þetta var fólk af erlendum uppruna.”

Hann segir að um leið og félagið hafi fengið fár af þessu hafi verið haft samband við lögreglu. Hins vegar hafi þau svör fengist frá lögreglu að haldbærar sannanir þurfi, áður en hægt sé að grípa í taumana. Því hafi hann sjálfur haft uppi á fólkinu. Lögreglan á Suðurnesjum er komið með málið á sitt borð, en þessir aðilar hafa sést víða í Reykjanesbæ að undanförnu. Þá hafa þeir einnig verið á höfuðborgarsvæðinu.

Aðspurður segir Daði fólkinu hafa haft einhvern pening af fólki. Hann biður því þá sem verða varir við það að hafa samband við lögreglu.

„Það hefur fólk haft samband við okkur, alveg grunlaust, og spurt hvort við værum með slíka söfnun í gangi. Við sáum það líka á blöðunum sem þeir eru með á sér, að þetta eru beinþýðingar úr Google translate. Þannig að það sést langar leiðir að þetta eru óprúttnir aðilar. Við vörum því fólk við svona löguðu enda myndi fólk á okkar vegum, sem selja happdrætti, vera merkt félaginu. Félagið hefur heldur aldrei staðið fyrir svona söfnunum úti á götu og mun aldrei standa í,” segir Daði.