Lula verður dreginn fyrir dóm vegna spillingarmála

Alríkisdómari í Brasilíu úrskurðaði í dag að Luiz Inacio Lula da Silva, fyrrverandi forseti landsins, verði dreginn fyrir dóm vegna ásakana um spillingu.

Ákæran á hendur Lula, sem gegndi embætti forseta Brasilíu á árunum 2003 til 2011, snýr að meintum mútugreiðslum í tengslum framkvæmdir á vegum ríkisrekna olíufyrirtækisins Petrobras. Mútugreiðslunar eiga að hafa numið 3,7 milljónir reais, um 127 milljónum króna.

Í frétt Reuters kemur fram að ákvörðun alríkisdómarans kunni að koma í veg fyrir að Lula snúi aftur í stjórnmálin, en hann hefur verið orðaður við endurkomu í stjórnmálin þar sem margir telja hann ætla sér að sækjast eftir forsetaembættinu árið 2018.

Öldungadeild brasilíska þingsins ákvað í síðasta mánuði að víkja Dilmu Rousseff, samflokkskonu Lula í Verkamannaflokknum og arftaka hans í embætti, úr stóli forseta. Henni var vikið tímabundið úr embætti í maí og var sökuð um að hafa hagrætt fjárlögum landsins til að hylma yfir vaxandi tekjuhalla ríkisins.

Varaforseti Rousseff, hægrimaðurinn Michel Temer, tók þá við embætti forseta.