Fimmtán ár síðan Linda opnaði Smáralind

Fimmtán ár eru í dag frá því að Smáralindin var opnuð þann 10.10.2001 klukkan 10.10. Linda Margrét Gunnarsdóttir, níu ára, opnaði Smáralindina ásamt Smára Páli Svavarssyni, ellefu ára. Þau voru bæði úr nærliggjandi hverfum, Smári var úr Smárahverfi en Linda úr Lindahverfinu.

Linda segist muna vel eftir deginum. „Þetta var mjög skemmtilegt,“ segir hún. Hún segir þó frægðina sem fylgdi því að opna Smáralindina hafa enst stutt. „Nei, ég þekkist ekki á því,“ segir Linda og hlær.

Í dag er Linda 24 ára og nemi á öðru ári í Landbúnaðarháskólanum. Hún er að læra búvísindi og stefnir að því að búa í sveit að náminu loknu en hefur ekki valið sér sveit. „Ég er með marga staði í huga því Ísland er svo fallegt.“

Sturla Eðvarðsson, framkvæmdastjóri Smáralindar, segir heilmikið hafa gerst í umhverfi Smáralindar á þessu tímabili. „Aðsókn í Smáralind hefur vaxið ár frá ári. Það hafa verið ýmsar eftirminnilegar uppákomur hér, eins og þegar Lindex var opnuð.“ En eins og frægt er orðið tæmdist þriggja vikna lager á þremur dögum.

„Við munum fagna þessum fimmtán ára tímamótum með glæsilegum hætti þegar við opnum inn á breytingarnar við Hagkaup í byrjun næsta mánaðar. Þá verður formleg hátíð Smáralindar,“ segir Sturla sem hefur verið framkvæmdastjóri frá árinu 2010.

„Það er heilmikið fram undan, það er mikið um að vera hér, miklar endurbætur á Smáralind og svo opna nýjar verslunarkeðjur eins og H&M útibú hérna á næsta ári,“ segir Sturla. Hann segir hrunárin hafa verið eftirminnileg, en nú horfi forsvarsmenn Smáralindar fram á veginn.

„Það voru erfiðleikar í kringum hrunið, það voru miklir erfiðleikar fyrir smásölumarkaðinn á Íslandi. En Smáralind sigldi í gegnum þetta. Við höfum, í framhaldi af þessum samdrætti sem varð í sölu á fatnaði og skóm og þess háttar, verið að horfa til sóknar frekar en eitthvað annað.“ 

Fréttin birtist fyrst í Fréttablaðinu.