Svana Katla með gull og silfur í Svíþjóð

Í gær fór fram sterkt sænskt katamót  í Stokkhólmi sem nefnist Swedish Kata Throphy. Ísland var með þrettán keppendur á mótinu og stóðu þau sig öll vel. Um 400 keppendur voru á mótinu frá 8 löndum og þar af margir landsliðsmenn. Bestum árangri í dag náði Svana Katla Þorsteinsdóttir sem endaði með gull og silfur. Þetta kemur fram í tilkynningu frá Karatesambandi Íslands.

Svana Katla Þorsteinsdóttir, Kristín Magnúsdóttir og Arna Katrín Kristinsdóttir byrjuðu daginn í gær á að vinna Hópkata kvenna, þar sem þær unnu lið frá Karlastad í Svíþjóð, þær stöllur munu keppa í Hópkata á næstkomandi Norðurlandameistaramóti. 

Í opnum flokki kvenna stóð Svana Katla sig best, vann fyrstu þrjár viðureignar sínar örugglega, andstæðingarnir voru allar frá Svíþjóð. Svana Katla mætti Carola Casale Sambo frá Ítalíu í úrslitum, þar sem sú ítalska hafði betur og fékk Svana Katla því silfur í opnum flokki kvenna. 

Kristín Magnúsdóttir tók svo bronsið í opna flokkinum, þar sem hún byrjaði á að vinna fyrstu 2 viðureignirnar, tapaði svo fyrir Carola í undanúrslitum en vann svo Olivia Wester frá Svíþjóð í viðureigninni um bronsið.  Auk þeirra kepptu Arna Katrín Kristinsdóttir, Laufey Lind Sigþórsdóttir og María Helga Guðmundsdóttir í flokknum.

Í opnum flokki karla áttum við fimm keppendur, Elías Snorrason, Aron Breki Heiðarsson, Arnar Júlíusson, Bogi Benediktsson og Aron Anh Huynh, þeir áttu ekki góðan dag í flokknum og duttu út í fyrstu og annarri umferð.



Í flokki karla U21 áttu Íslendingar tvo keppendur, Boga Benediktsson og Aron Breka Heiðarsson. Bogi stóð sig vel, vinn fyrstu tvær viðureignirnar og mætti Stefan Vasic Solna frá Svíþjóð í úrslitum, en þrátt fyrir góða útfærslu hjá Boga þá vann Stefan sigur og flokkinn. Aron Breki hafði mætt Stefan í undanúrslitum en beðið lægri hlut og fékk upp úr því bronsið í flokkinum.

Þegar uppi var staðið þá fengu Íslendingar eitt gull, tvö silfur og tvö brons á mótinu. Norðurlandameistaramótið fer fram í Danmörku 9. apríl næstkomandi. Með keppendum í för var Magnús Kr. Eyjólfsson landsliðsþjálfari í kata, Ævar Östfjörð liðsstjóri og Helgi Jóhannesson sem dæmdi á mótinu.

Verðlaun í gær:

Gull í hópkata:, Svana Katla Þorsteinsdóttir,  Kristín Magnúsdóttir og Arna Katrín Kristinsdóttir

Silfur í kata kvenna: Svana Katla Þorsteinsdóttir

Brons í kata kvenna: Kristín Magnúsdóttir

Silfur í kata 18-21árs: Bogi Benediktsson

Brons í kata 18-21árs: Aron Breki Heiðarsson