Hakkari fær átján mánaða dóm fyrir að stela nektarmyndum fræga fólksins

Dómstóll í Pennsylvaníu í Bandaríkjunum hefur dæmt 36 ára karlmann, Ryan Collins, í átján mánaða fangelsi fyrir að hafa stolið þúsundir mynda, meðal annars nektarmyndum, úr einkasafni rúmlega hundrað manna.

Á meðal þeirra sem urðu fyrir barðinu á Collins voru leikkonurnar Jennifer Lawrence og Aubrey Plaza og söngkonurnar Rihanna og Avril Lavigne.

Í frétt Guardian kemur fram að Collins hafi verið tveimur árum við að safna saman notendanöfnum og lykilorðum fólksins.

Með því að senda þeim platpósta í nafni Google og Apple tókst honum að komast yfir aðgang að rúmlega fimmtíu Apple iCloud reikningum og 72 Gmail-reikningum.

Myndirnar voru birtar á netinu árið 2014 og vakti málið gríðarlega athygli þar sem gagnrýni beindist meðal annars að Apple fyrir að tryggja ekki öryggi persónuupplýsinga í iCloud með fullnægjandi hætti.