Málverkum stolið úr nýju galleríi við Skúlagötu

„Það hafa einhverjir látið hendur standa frammi úr ermum og verið duglegir um páskana,“ segir listamaðurinn Marteinn Bjarnar Þórðarsson. Sex málverkum var stolið úr nýju sýningarrými hans um páskana. Hann er ótryggður fyrir tjóninu en ætlar sér að stilla upp nýrri sýningu við fyrsta tækifæri.

Marteinn og sex aðrir listamenn hafa verið með vinnustofu á efstu hæð Skúlagötu 26. Tóku þau nýlega við húsnæðinu þar sem Domino's var áður með verslun en pizzastaðurinn hefur flutt sig um set yfir götuna. Var ætlunin að setja upp gallerý þar, Gallery Atelier, og var Marteinn búinn að stilla málverkum sínum upp til sýnis í glugga rýmisins.

„Ég var sá eini sem var búinn að stilla upp málverkum þarna inni. Ég setti upp útstillingu í gluggann og henni var hreinlega stolið eins og hún leggur sig,“ segir Marteinn í samtali við Vísi.

Alls er um sex málverk að ræða, sem sjá má í myndasafninu hér fyrir neðan, og svo virðist sem að hinir bíræfnu þjófar hafi látið greipar sópa á aðfaranótt mánudags. Marteinn segir að tjónið sé fyrst og fremst tilfinningalegt fremur en fjárhagslegt.

„Ég var búinn að stilla upp myndum í ákveðnu þema sem er forsögulegt sjávarfang. Þetta eru mjög auðþekkjanlegar myndir og frekar leiðinlegt tjón vegna þess að nú er þetta þema bara horfið,“ segir Marteinn.

Svo virðist sem að þjófarnir hafi spennt upp dyrnar á rennihurð til þess að koma inn. Marteinn segist hafa nú þegar rætt við lögreglu sem hafi tekið skýrslu og sé kominn í málið. Hann var ótryggður en ætlar sér að setja upp nýja sýningu fljótlega.

„Ég er alveg óhræddur við það en ætli maður tryggi myndirnar fyrst. Ég er með annað þema sem ég ætla að stilla upp í glugganum. Það þarf reyndar fyrst að ganga úr skugga um það að ekki hægt að brjótast inn um þessa rennihurð,“ segir Marteinn sem biður þá sem upplýsingar geti haft um myndirnar og afdrif þeirra að hafa samband við lögreglu.

Hin stolnu málverk má sjá í myndasafninu hér fyrir neðan.