Stígur út fyrir kassann

„Ég hef aldrei haldið upp á afmælið mitt, alltaf verið frábitin því en nú ákvað ég að gera það með sérstökum hætti og ætla að vera með opið hús í Fella-og Hólakirkju,“ segir Arnhildur Valgarðsdóttir organisti sem fagnar nýliðnu fimmtugsafmæli í dag klukkan 17 og vonar að fólk mæti. Veislustjóri verður besta vinkona hennar, Hafdís Eygló Jónsdóttir, jarðfræðingur.

„Ég ætla að sýna myndir af málverkum sem ég hef verið að mála í sumar og spila ljúfa tónlist á flygilinn. Þetta eru auðvitað bara amatöramyndir en lögin eru eftir Gabriel Yared, Agnar Má Magnússon djassara og Astor Piazolla,“ segir Arnhildur um upphafsatriði dagskrárinnar.

„Sumar myndirnar verða til sölu til ágóða fyrir eigin mennta-og tónlistarsjóð, ég er nefnilega nýflutt í litla íbúð og vil ekkert dót. En það koma fram söngvarar, hljóðfæraleikarar og kórar með allskonar atriði, bæði klassísk og á léttari nótum og auðvitað verður Ágústa Dómhildur, dótla mín með fiðluna sína.

Þetta verður tónlistarveisla. Mamma og dóttir mín eru líka að búa til snittur, ítalskar kjötbollur og allskonar góðgæti til að bjóða upp á, svo verður kaffi og kampavín.“

Arnhildur kveðst hafa spilað sjálf milljón sinnum í veislum en þegar komi að hennar eigin afmælisveislu sé hún smá nervus.

„Ég vil engar ræður, bara tónlist og spjall. Reyndar ætla ég að hafa miða frammi og biðja fólk um heilræði, brandara eða skilaboð sem hægt verður að lesa upp, allt nafnlaust.

Ég tala um þetta eins og þetta sé einhver heimsráðstefna en svo er þetta bara venjulegt afmæli í Breiðholtinu en Fella-og Hólakirkja er frábært tónlistarhús og það er yndislegt útsýni úr safnaðarheimilinu. Ég er pínu stressuð að sýna þessar myndir mínar, en svo hugsaði ég: Bíddu ég er orðin fimmtug, hversu gömul á ég að verða til að þora að fara aðeins út fyrir kassann?“