Fékk konungsleyfi fyrir bæjarfána í Borgum

Afi ólst upp sem sveitarómagi á Rangárvöllum eftir að jörð foreldranna fór í eyði vegna sandfoks og fjölskyldan flosnaði upp. Systkinin voru tíu en aðeins fimm þeirra komust til fullorðinsára. Við fundum handrit eftir afa frá árinu 1905 og sú lesning lætur engan ósnortinn,“ segir Karl Skírnisson dýrafræðingur sem hér er að tala um Hákon Finnsson, bónda í Borgum í Hornafirði. 

Karl og frændi hans, Hákon Hansson dýralæknir, hafa gefið út bók um þennan afa sinn og  ætla að halda útgáfuhátíð klukkan 15.30 á morgun, 4. september á bókasafni Tilraunastöðvarinnar á Keldum.

„Þetta er harðspjaldaútgáfa með 84 myndum. Sumar eru eftir Höskuld Björnsson listmálara, til dæmis kápumyndin af Borgum. Afi fékk konungsleyfi fyrir bæjarfána, hann hékk við hliðina á íslenska fánanum uppi á bænum, sem Hákon hannaði sjálfur í burstastíl og lýst er í smáatriðum í bókinni,“ segir Karl.

Einn kaflinn er um organistann, kórstjórann og kennarann því eftir að Hákon fór í Möðruvallaskóla og varð hann unglingakennari austur á landi,  að sögn Karls. En hvað um ástarsögu afa hans og ömmu?

„Afi kemur um aldamótin austur í Fljótsdal. Þar kynnist hann Ingiríði ömmu sem er þar vinnukona. Eftir það fer hann til Danmerkur og í Skotlands að vinna á búgörðum og kynna sér landbúnað.

Kemur til landsins aftur 1906 með Vestu frá Skotlandi til Reykjavíkur og kaupir sér hestinn Blesa, sem var reiðhestur hans í mörg ár. Byrjar á að fara austur fyrir fjall að heimsækja vini sína sem eru í veri í Þorlákshöfn, skoða Gullfoss, Geysi og Þingvöll, ríður upp á Hvanneyri, fer svo austur norðanlands og lýsir því þegar hann kemur að Skriðuklaustri og hittir Ingu ömmu aftur. Þá hafði hún setið í festum í tvö ár.

Þau opinbera trúlofun eftir 20 daga og gifta sig ári seinna. Þessu er lýst í smáatriðum í bókinni.“

Hákon gerðist  síðar frumkvöðull í ræktun í Hornafirði og fékk heiðursgjöf úr styrktarsjóði Kristjáns konungs níunda „fyrir framúrskarandi dugnað í jarðabótum, byggingum og öðru sem að búnaði lýtur.“