Upphitun fyrir leiki dagsins: Chelsea getur unnið tíunda leikinn í röð | Myndband

Átta leikir fara fram í ensku úrvalsdeildinni í fótbolta í kvöld.

Þrír leikir hefjast klukkan 19:45.

Liverpool, sem hefur aðeins unnið einn af síðustu fjórum leikjum sínum, sækir Middlesbrough heim á Riverside völlinn.

Þarna mætast besta og versta sóknarlið deildarinnar. Ekkert lið hefur skorað fleiri mörk en Liverpool (37) en ekkert lið jafn fá og Boro (13).

Leikur Middlesbrough og Liverpool verður sýndur í beinni útsendingu á Stöð 2 Sport HD.

Chelsea getur unnið tíunda leikinn í röð þegar liðið fer til Sunderland og mætir heimamönnum. Chelsea hefur verið óstöðvandi að undanförnu á meðan Sunderland vermir botnsæti deildarinnar.

Ekkert lið hefur haldið jafn oft hreinu í úrvalsdeildinni og Chelsea (9) á meðan Sunderland hefur fengið á sig a.m.k. eitt mark í 15 af síðustu 16 deildarleikjum sínum.

Á London Stadium, hinum umdeilda heimavelli West Ham, taka heimamenn á móti Burnley.

Jóhann Berg Guðmundsson er enn á sjúkralistanum hjá Burnley sem vann mikilvægan 3-2 sigur á Bournemouth um helgina.

Burnley hefur verið skelfilegt á útivelli á tímabilinu og aðeins náð í eitt stig í sex útileikjum og skorað eitt mark.

Klukkan 20:00 hefjast svo fimm leikir.

Á Selhurst Park mætast liðin sem áttust við í úrslitaleik ensku bikarkeppninnar í vor; Crystal Palace og Manchester United.

Man Utd hefur aldrei tapað fyrir Palace í úrvalsdeildinni. United hefur unnið 11 leiki og þrisvar sinnum hefur orðið jafntefli.

Leikur Crystal Palace og Manchester United verður sýndur í beinni útsendingu á Stöð 2 Sport 2 HD.

Manchester City, sem hefur tapað tveimur leikjum í röð með markatölunni 7-3, fær Watford í heimsókn.

City-menn hafa gefið eftir að undanförnu en vörn liðsins hefur verið lek. City hefur aðeins haldið hreinu í einum af síðustu 17 leikjum sínum. Watford hefur einnig átt í vandræðum með varnarleikinn og fengið á sig níu mörk í síðustu tveimur útileikjum sínum.

Gylfi Þór Sigurðsson og félagar í Swansea City heimsækja West Brom á The Hawthornes.

Gylfi hefur verið í góðum gír að undanförnu en hann hefur alls skorað fimm mörk og gefið fimm stoðsendingar á tímabilinu.

Tottenham Hotspur tekur á móti Hull City og þarf nauðsynlega á þremur stigum að halda eftir tapið á Old Trafford um síðustu helgi.

Spurs hefur tapað tveimur af síðustu þremur leikjum sínum á meðan Hull hefur tapað fimm útileikjum í röð.

Þá eigast Stoke City og Southampton við á bet365 vellinum. Liðin eru í 11. og 12. sæti deildarinnar en aðeins einu stigi munar á þeim.