Glódís: Vorum orkulausar í síðari hálfleiknum

„Við erum mjög svekktar. Mér fannst við betri í þessum leik og í fyrri hálfleik eigum við leikinn, þær fá tvær sóknir og skora eitt mark,“ segir Glódís Perla Viggósdóttir, leikmaður íslenska kvennalandsliðsins, eftir að liðið hafði tapað 1-0 fyrir Dönum á Sincere Cup í Kína í dag.

Glódís var ósátt við sjálfan sig í varnarleiknum þegar Danir skoruðu eina mark leiksins.

„Við fengum þetta mark svolítið bara í andlitið. Við vorum að skapa okkur fín færi og komast inn í teiginn hjá þeim. Síðan fáum við þetta mark á okkur og það drap svolítið á liðinu, við höfðum ekki orku í síðari hálfleiknum.“

Hún segir að Danir hafi síðan spilað skynsamlega eftir að hafa komist 1-0 yfir.

„Þær tóku sinn tíma í allar aðgerðir og gerðu þetta bara vel. Það sem við tökum jákvætt út úr þessum leik er að þegar liðið pressar upp völlinn, þá tókst það mjög vel hjá okkur.“