Fagna áformum um að efla tölvubrotadeild

Hallgrímur Kristinsson, stjórnarformaður Félags rétthafa í sjónvarps- og kvikmyndaiðnaði (FRÍSK), segist taka áformum Ólafar Nordal innanríkisráðherra um að efla tölvubrotadeild lögreglunnar fagnandi.

„Við gerum það eðlilega. Við höfum oft reynt að benda á að þessi málaflokkur fái allt of litla athygli hjá hinu opinbera og þarna virðist ráðherra sem betur fer vera sammála okkur,“ segir Hallgrímur.

Innanríkisráðherra skipaði nefnd sem vann tillögur til að gera úttekt á umfangi ólöglegs niðurhals síðasta vetur og lagði hún fram tillögur til að vinna gegn því á dögunum. Brynjar Níelsson, þingmaður og formaður nefndarinnar, segir tillögurnar snúast um að veita fjármagn til tölvubrotadeildar. Ekki til almenns eftirlits heldur til að taka á stórum málum sem kæmu inn og bregðast við þeim.

„Svo eru önnur atriði sem koma lögreglumálum ekki við heldur eru einhverjar aðferðir til að draga úr þessu,“ segir Brynjar. Ein þeirra áforma eru að skylda fjarskiptafyrirtæki til þess að upplýsa notendur skráarskiptasíða um hugsanleg lögbrot með viðvörunarglugga (e. pop-up).

Ekki verður stofnað sérstakt embætti fyrir málaflokkinn og þá ná áformin ekki til annarra netglæpa á borð við hatursáróður.

Hallgrímur segir FRÍSK ekki hafa komið að starfi nefndarinnar með beinum hætti en veitt þeim upplýsingar. Lét FRÍSK nefndina fá skýrslu sem gerð var fyrir félagið fyrr í ár. Í skýrslunni segir að tap höfundarréttarhafa vegna niðurhals á höfundarréttarvörðu efni nemi um milljarði króna ár hvert. Sú tala tekur þó einungis til sjónvarpsefnis og kvikmynda. Hallgrímur vill hins vegar vara við þeim misskilningi að talan ætti að vera minni þar sem ekki allir myndu annars kaupa efnið. „Þarna er einungis búið að taka saman þá prósentu sem annars hefði keypt efnið,“ segir hann og bætir því við að ella væri talan miklu hærri. Þá er tap vegna samkeppni við þjónustur á borð við Netflix, um 650 milljónir á ári, heldur ekki innifalið í tölunni.

„Það var mat manna að þetta væri umtalsvert tjón fyrir marga. Það var spurning hvernig ætti að bregðast við því og það var farið í ýmis atriði sem kæmu til álita. Eitt af þeim var að lögregla gæti brugðist við þessum stærstu málum,“ segir Brynjar. Hann segir umrætt niðurhal skapa gríðarlegt tjón. Þegar álíka mál komi upp um brot á höfundarrétti hönnuða sé gripið til aðgerða. Þó segir Brynjar ekki mega ganga of langt á friðhelgi einkalífs fólks. 

Þriðjungur halar niður höfundarréttarvörðu efni

Samkvæmt rannsókn sem Jónas Orri Jónasson og Helgi Gunnlaugsson gerðu í apríl fyrr á þessu ári hörðu tæp þrjátíu prósent Íslendinga halað niður höfundarréttarvörðu efni á fyrstu þremur mánuðum ársins.

Þar af voru 63 prósent á aldrinum átján til 29 ára. Hins vegar voru öllu færri sem náðu í höfundarréttarvarið efni yfir sextíu ára aldri, alls fjögur prósent.

Fréttin birtist fyrst í Fréttablaðinu.