Beckenbauer sektaður af FIFA og fær aðvörun

Franz Beckenbauer hefur verið sektaður af siðanefnd FIFA og auk þess fengið aðvörðun fyrir að sýna ekki samstarf við spillingarrannsókn í tengslum við HM 2018 og HM 2022.

Útboðið á keppnunum fór fram samtímis og var Beckenbauer í hóppi þeirra 22 einstaklinga sem sátu í framkvæmdastjórn Alþjóðaknattspyrnusambandsins, FIFA, og réðu því hvaða lönd fengu keppnirnar.

Sjá einnig: Beckenbauer viðurkennir mistök

Beckenbauer var í júní síðastliðnum settur í skammtímabann frá afskiptum í knattspyrnumálum vegna málsins en það stóð yfir í 90 daga.

FIFA segir að Beckenbauer hafi ítrekað hunsað beiðnir rannsóknarnefndarinnar um aðstoð við rannsókn sína á útboðsferlinu. Hann hafi hvorki sýnt samstarf í viðtali né við skriflegum spurningum rannsakenda.

Siðanefnd FIFA hefur áður dæmt þá Sepp Blatter, forseta FIFA, og Michel Platini, forseta UEFA, í átta ára bann auk þess sem að fjöldi annarra hátt settra embættismanna úr knattspyrnuheiminum hefur verið refsað fyrir spillingarmál.