Segir Norður-Kóreu meðal fremstu kjarnorkuvelda

Kim Jong Un, einræðisherra Norður-Kóreu, segir að vel heppnað tilraunaskot á dögunum sýni að landið sé meðal fremstu kjarnorkuvelda. Herinn skaut í gær eldflaug úr kafbáti og flaug hún í um 500 kílómetra í áttina að Japan.

Á vef opinberrar fréttaveitu Norður-Kóreu segir að Kim hafi leitt tilraunaskotið í gær og myndir voru birtar af honum fagna með meðlimum hersins.

Sjá einnig: Eldflaugatilraunir Norður-Kóreu halda áfram

Samkvæmt Reuters fréttaveitunni var eldflauginni skotið á loft úr eina kafbáti landsins sem er þess til gerður. Yfirvöld í Japan segja eldflaugina hafa náð inn á loftvarnasvæði þeirra og er það í fyrsta sinn sem eldflaug frá Norður-Kóreu fer svo langt.

Eftir skotið gáfu yfirvöld í Kína út að þau væru andsnúin kjarnorku- og eldflaugaáætlun Norður-Kóreu.

Yfirvöld í Pyongyang hafa haldið því fram að þeim hafi tekist að framleiða kjarnorkuvopn sem mögulegt væri að koma fyrir í eldflaug sem drægi jafnvel til Bandaríkjanna, svokallað "re-entry" en það hefur verið dregið í efa af sérfræðingum.

Í síðasta mánuði tilkynntu yfirvöld Bandaríkjanna og Suður-Kóreu að svokölluðu THAAD-kerfi yrði komið fyrir til að sporna gegn mögulegum kjarnorkumætti Norður-Kóreu. Kínverjar og Norður-Kórea hafa mótmælt uppsetningu slíks kerfis í Suður-Kóreu.