Acoff áfram í Laugardalnum

Drion Jeremy Acoff hefur skrifað undir nýjan tveggja ára samning við Þrótt en þetta kemur fram í fréttatilkynningu frá félaginu.

Acoff átti frábært tímabil með Þrótti í 1. deildinni í fyrra og skoraði þá sjö mörk í 20 leikjum. Hann var bæði valinn leikmaður ársins hjá Þrótti og íþróttamaður félagsins.

„Dion var algjör lykilmaður í því að tryggja meistaraflokki karla sæti í efstu deild. Hann skoraði sæg af mörkum í öllum mótum og lagði einnig upp talsverðan fjölda fyrir liðsfélaga sína,“ sagði Gregg Ryder, þjálfari Þróttar, í tilkynningunni.

„Þessi framlenging við Dion sýnir gagnkvæma skuldbindingu félags og leikmanns. Hann á eftir að gera allt vitlaust í Pepsi-deildinni næsta sumar!“ sagði Ryder.

Hér má lesa fréttatilkynningu Þróttar í heild sinni:

„Það ríkir því mikil gleði í höfuðstöðvum Þróttar í Laugardalnum í augnablikinu þar sem Bandaríkjamaðurinn Dion Jeremy Acoff var rétt í þessu að framlengja samning sinn við félagið til næstu tveggja ára.

Dion var valinn besti leikmaður meistaraflokks karla í knattspyrnu hjá Þrótti árið 2015 og einnig íþróttamaður félagsins. Það gekk flest upp hjá Dion í fyrra og miklar væntingar eru bornar til leikmannsins fyrir tímabilið, sem hefst formlega 1. maí með heimleik Þróttar við Íslandsmeistara FH.

„Dion var algjör lykilmaður í því að tryggja meistaraflokki karla sæti í efstu deild. Hann skoraði sæg af mörkum í öllum mótum og lagði einnig upp talsverðan fjölda fyrir liðsfélaga sína. Hann var að flestra mati besti sóknarmaður deildarinnar í fyrra, ásamt Viktori Jónssyni, og svo sannarlega sá fljótasti. Þessi framlenging við Dion sýnir gagnkvæma skuldbindingu félags og leikmanns. Hann á eftir að gera allt vitlaust í Pepsi-deildinni næsta sumar!“ segir Gregg Ryder, þjálfari Þróttar.

„Þessi framlenging skiptir okkur miklu máli. Meðal viðurkenninga Dions fyrir síðasta tímabil var að hann var valinn í úrvalslið deildarinnar í mótslok, ásamt því að hann þótti besti leikmaðurinn á fyrri hluta mótsins, umferða 1-11. Dion er alinn upp í knattspyrnuakademíu Arsenal, en sleit barnsskónum í Los Angeles þar sem hann heldur til yfir háveturinn og hinkrar eftir íslenska vorinu. Þetta er gríðarlega teknískur og flinkur leikmaður, mjög skapandi og með góða yfirsýn. Og algjör ljúflingur í ofanálag. Við gætum ekki verið ánægðari hér í dalnum. Það er hamingja í hjartanu í Reykjavík,“ segir Ótthar S. Edvardsson framkvæmdastjóri Þróttar.“