Strákarnir fengu frí frá öllu í gær: „Við erum stundum eins og eldri borgarar“

Strákarnir okkar í íslenska fótboltalandsliðinu eru búnir að vera saman nær öllum stundum í einn mánuð þökk sé góðum árangri þeirra á Evrópumótinu. Fyrstu menn komu saman 23. maí en allur hópurinn viku seinna þegar deildarkeppni í Evrópu lauk.

Einhvernveginn þarf að halda mönnum ferskum og er ýmsum ráðum beitt. Strákarnir okkar fengu frí í gær og máttu gera það sem þeir vildu frá morgni til kvölds. En hvernig er íslenska liðinu haldið á tánum þannig dagarnir verði ekki allir eins?

„Við erum með ákveðið plan í þessu öllu saman. Í gær fannst okkur mikilvægt að gefa mönnum frí frá þessu öllu saman; frí frá okkur, fundum og æfingum. Menn gátu gert það sem þeir vildu í gær. Stór hópur fór í golf, stór hópur fór í siglingu um vatnið og þeir borðuðu úti á veitingastöðum. Það er gott að vera Íslendingur að því leytinu til því það þekkja okkur svo fáir,“ sagði Heimir Hallgrímsson og hló við í samtali við Vísi á æfingu landsliðsins í dag.

„Þetta var held ég mjög nauðsynlegt. Ég vona að leikmenn komi brosandi á æfingu í dag. En við erum svo með keppni á hverjum degi í ýmsum greinum sem Þorgrímur stýrir. Hann fékk svo Magga Gylfa til að stjórna nokkrum fyrir sig. Það er púttvöllur á hótelinu líka og svona. Við erum stundum eins og eldri borgarar; það er keppni á hverjum degi.“

Fá að vera í friði

Því lengra sem liðið nær á Evrópumótinu verður mikilvægi þess að íslenski hópurinn valdi að gista í Annecy alltaf meira. Ákvörðunin gæti í raun ekki hafa verið betri. Þó strákarnir okkar séu orðnir stjörnur í dag er stemningin fyrir EM ekki það mikil í bænum sem hentar Íslandi vel.

„Þetta er lykilþáttur í dag sem ég gerði mér ekki nógu mikla grein fyrir í upphafi. Það skiptir svo miklu máli að vera á stað þar sem þú ert algjörlega einn. Við erum á hóteli einir þannig við þurfum ekki að taka tillit til einhverra annarra,“ sagði Heimir.

„Umhverfið er svo fallegt hérna að það róar mann niður og bærinn er þannig að menn geta verið frjálsir. Það er ekki mikill fótboltaáhugi í Annecy. Þetta virðist vera meira vel stætt fólk í sumarleyfunum sínum þannig leikmennirnir fá frið og geta rölt um bæinn sem er rosalega mikilvægt,“ sagði Heimir Hallgrímsson.

Ekki missa af neinu sem gerist á EM í Frakklandi. Vísir er með hóp fjölmiðlamanna á mótinu sem færa ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).