Bjargar hjólabrettamenningunni í Gautlandi

„Ég flutti til bæjarins Dals Långed í Svíþjóð ásamt fjölskyldu minni fyrir rúmum tveimur árum til þess að læra húsgagnaviðgerðir og smíði. Ég er sjálfur gamall skeitari og langaði til að kenna krökkunum mínum á hjólabretti en hér var engin aðstaða fyrir þau til að æfa sig. Þannig kom hugmyndin til og þá var bara að redda þessu sjálfur. Nokkrum fundum síðar var ég kominn í samstarf með sveitafélaginu sem borgði brúsann. Fyrst smíðaði ég lítið skate-park í næsta bæ og í kjölfarið byggði ég pall sem stendur við leiksvæðið í hverfinu í bænum okkar,“ segir smiðurinn og hjólabrettakappinn Styrmir Guðmundsson sem á heiðurinn að tveimur hjólabrettarömpum sem risið hafa í sumar í sveitarfélaginu Bengtsfors í Gotlandi í suðurhluta Svíþjóðar.



Ramparnir hafi vakið nokkra athygli fjölmiðla á svæðinu sem hafa fjallað töluvert um verkefnið, bæði í sjónvarpi og dagblöðum.

Þó pallarnir séu helst nýttir af ungviðinu í bænum þá koma einnig eldri hjólabrettaiðkendur til þess að njóta þeirra, og auðvitað Styrmir sjálfur. „Krökkunum í hverfinu þykir agalega gaman þegar pabbinn sem smíðaði rampinn kemur og rennir sér.“

Fleiri verkefni hafa boðist Styrmi í kjölfarið, meðal annars það að halda smíðanámskeið fyrir krakka í haustfríinu. „Þá ætlum við að smíða eitthvað frá grunni. Það fer í taugarnar á mér hversu mikið er af óæskilegum og óumhverfisvænum efnum á borð við plast, í leikföngum og öðru sem markaðsett er fyrir börn. Mig langar því að kynna náttúrulegan efnivið fyrir krökkum og um leið sýna þeim að maður getur smíðað allt sem maður vill.“

Þegar hann er að lokum spurður hvort fjölskyldan ætli að flytja aftur heim til Íslands, svarar hann einfaldlega: „Það verða næstu kosningar á Íslandi að leiða í ljós.“ 

Greinin birtist fyrst í Fréttablaðinu þann 28. september.