Eins og að yfirgefa rokkhljómsveit

„Það er auðvitað alltaf erfitt að kveðja sýningar sem maður hefur tekið þátt í, sérstaklega sýningu sem þessa þar sem allur hópurinn tekur ríkan þátt í að skapa. Þetta er meira eins og að ganga út úr hljómsveit – eins og ég sé að yfirgefa rokkhljómsveitina mína – og tilfinningarnar eru blendnar,“ segir leikkonan Unnur Ösp Stefánsdóttir sem hefur sagt skilið við hlutverk Hallgerðar langbrókar í leikverkinu Njálu vegna óléttu. Við keflinu tekur Elma Stefanía Ágústsdóttir.

Njála er byggð á Brennu-Njáls Sögu og sýnd í Borgarleikhúsinu. Verkið var tilnefnt til alls ellefu Grímu verðlauna í fyrra og hlaut tíu Grímur, meðal annars fyrir sýningu ársins.

„Þetta er mjög líkamlega krefjandi hlutverk, það er mikið um dans, hopp og að ég kasti mér í gólfið, þannig í ljósi þess var ágætt að fá að stíga til hliðar. Það var líka alveg geggjuð upplifun að fá að sitja úti í sal um daginn og horfa á sýninguna, það eru fáir leikarar sem fá tækifæri til þess að vera áhorfandi á eigin sýningu.“

Leikkonan Elma Stefanía tekur við hlutverki Hallgerðar af Unni. Hún segir undirbúning hafa gengið vel og að það sé einstaklega gaman að fá að taka þátt í sýningu sem þessari.

Innt eftir því hvort það sé mikið mál að taka við hlutverki með svo stuttum fyrirvara, svarar Elma Stefanía að það sé erfitt en vel hægt. „Maður gerir bara það sem þarf að gera; lærir að dansa með Íslenska dansflokknum og svo framvegis. Undirbúningurinn hefur gengið vel og það er alveg ótrúlega gaman að fá að taka þátt í þessari sýningu. Þetta er bara eins og að vera með í rokk „showi“.“

 

Unnur Ösp vinnur einnig að uppsetningu verksins Brot úr hjónabandi sem byggt er á sjónvarpsþáttum eftir Ingmar Bergman frá 1973, í leikstjórn Ólafs Egils Egilssonar. Verkið er hressandi og sársaukafullt uppgjör hjóna og mótleikari Unnar Aspar er eiginmaður hennar, leikarinn Björn Thors.

Unnur segir það sannarlega skrítið fyrir þau hjónin að stíga í þessi hlutverk í ljósi aðstæðna.

„Við erum auðvitað bara að vinna vinnuna okkar og nálgumst þetta á faglegum forsendum. En sambandið má vissulega ekki hanga á bláþræði þegar maður fer inn í skilnaðardrama. Þetta er ansi nærgöngult verk og krefjandi en á sama tíma skemmtilegt og mikil forréttindi að fá að taka þátt í þessu með manninum sínum. Við höfum grínast með það að Brad (Pitt) og Angelina (Jolie) og Tom (Cruise) og Nicole (Kidman) skildu öll eftir að hafa leikið í „hjónamyndunum“ sínum. Við fetum vonandi ekki í fótspor þeirra en við spyrjum að leikslokum ,“ segir hún og hlær.