Innlent

Hugleiða að breyta 70 milljóna grunni úr hruninu í nestispall í þjóðgarðinum

Garðar Örn Úlfarsson skrifar
Ekki er víst að steypumassinn sem fluttur var á þessa lóð við Valhallarstíg verði fjarlægður eignist ríkið mannvirkið.   Fréttablaðið/Auðunn
Ekki er víst að steypumassinn sem fluttur var á þessa lóð við Valhallarstíg verði fjarlægður eignist ríkið mannvirkið. Fréttablaðið/Auðunn

„Það er mat Þingvallanefndar að um einstakt tækifæri sé að ræða í ljósi staðsetningar lóðarinnar og ástands hennar að öðru leyti,“ segir Ólafur Örn Haraldsson þjóðgarðsvörður í bréfi þar sem hann óskar eftir því fyrir hönd Þingvallanefndar að forsætisráðuneytið beiti sé fyrir því að fjárheimild fáist til að kaupa 70 milljóna króna húsgrunn.

Eins og fram hefur komið í Fréttablaðinu vill Þingvallanefnd neyta forkaupsréttar og ganga inn í kaup á 139 fermetra húsgrunni með kjallara við Þingvallavatn.

Þjóðgarðsvörður segir í bréfinu að Þingvallanefnd telji staðsetningu lóðarinnar skipta máli. Hún sé við bakka Þingvallavatns. Ofan við hana sé göngustígur og ekki sé unnt að ganga með vatnsbakkanum vegna legu lóða og sumarhúsa.

„Lóðin liggur í beinu framhaldi af Almannagjá og er til þess fallin að tengja þinghelgina og aðgengi að Þingvallavatni og þar með auka það svæði sem verði gestkomandi aðgengilegt. Lóðir sem liggja við bakka Þingvallavatns norðan við lóðina eru í eigu einstaklinga og þar með ekki opnar almenningi,“ rekur þjóðgarðsvörður.

Ólafur Örn Haraldsson, þjóðgarðsvörður á Þingvöllum. Fréttablaðið/Vilhelm

Þá segir Ólafur Örn að Þingvallanefnd bendi á að við vatnsbakka Þingvallavatns sé talsvert sýnilegt álag af völdum ágangs. Með því að opna aðgengi að vatninu telji nefndin að mögulegt sé að draga úr umferð gangandi fólks meðfram vatnsbakkanum. Á lóðinni sé gróður, slétt undirlendi og útsýni yfir vatnið og hið friðhelga svæði sé mikið.

„Telur Þingvallanefnd að ákvörðunin stuðli að því að vernda og viðhalda náttúrufari þjóðgarðsins og veita almenningi kost á að njóta hins friðhelga svæðis. Þá telur nefndin að hægt sé að nýta hinn steypta grunn fyrir gesti þjóðgarðsins, til dæmis fyrir nestisaðstöðu,“ segir þjóðgarðsvörður.

Áhöld eru um hvort eigendur húsgrunnsins hafi haft heimild til að rífa tvö eldri sumarhús og steypa umræddan húsgrunn á leigulóðinni frá ríkinu eins og Fréttablaðið hefur greint frá og er málið í biðstöðu í forsætisráðuneytinu.

„Þingvallanefnd telur málefnalegt að neyta forkaupsréttar að hinum steypta grunni. Verði mannvirki byggt á grunninum er ljóst að það verður stærsta mannvirki innan þjóðgarðsins í eigu einstaklinga,“ segir þjóðgarðsvörður í bréfinu sem kveður þó jafnframt óvissu um hvaða framkvæmdir voru samþykktar af byggingarfulltrúa og Þingvallanefnd og hvort þær framkvæmdir sem þegar séu hafnar samræmist leyfum þessara aðila.

Enn fremur segir þjóðgarðsvörður Þingvallanefnd telja nauðsynlegt að tryggja nefndinni full umráð lóðarinnar með vísan til framangreindra sjónarmiða. „Þá vill Þingvallanefnd benda á í þessu samhengi að nefndinni hefur ekki boðist að kaupa lóðir á Þingvöllum í sambærilegu ástandi og sú sem um ræðir hér,“ skrifar hann. Vegna þessa er þó vert að undirstrika að ríkið á nú þegar lóðina og er eingöngu að kaupa steypugrunninn sem dagaði uppi við vatnið í bankahruninu. 

Fréttin birtist fyrst í Fréttablaðinu


Tengdar fréttir

Talsverð óvissa með nýtingu forkaupsréttar

Fulltrúar stjórnarandstöðu í Þingvallanefnd undrast orð formannsins um að ákvörðun um nýtingu forkaupsréttar hafi ekki verið tekin. Þeir segjast hafa skilið það svo að ekki stæði til að kaupa grunn að sumarhúsi við Valhallarstíg

Lýstu yfir vilja til að nýta forkaupsrétt

Þingvallanefnd mun óska eftir því að Forsætisráðuneytið skoði feril málsins varðandi Valhallarstíg nyrðri 7 og möguleika á fjármögnun á kaupum lóðarinnar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.