Hörmuleg byrjun sló Þóri og norsku stelpurnar ekki útaf laginu

Noregur og Danmörk enduðu bæði riðlakeppnina á EM kvenna í handbolta með fullt hús en þau þurftu bæði að grafa sig upp úr holu í lokaumferðinni í kvöld.  Þórir Hergeirsson þurfti að taka leikhlé snemma til að rétta af leik sinna stelpna í norska liðinu.

Norsku stelpurnar unnu á endanum tveggja marka sigur á Rússum, 23-21 og unnu D-riðilinn en dönsku stelpurnar unnu þriggja marka sigur á Tékkum, 32-29, og unnu með því C-riðilinn.

Bæði lið fara því með fjögur stig inn í milliriðil tvö en keppni í honum hefst strax á sunnudaginn. Önnur lið í milliriðlinum eru Tékkland (2 stig), Ungverjaland (0 stig), Rúmenía (2 stig) og Rússland (0 stig).

Norska liðið náði með þessu að hefna fyrir tapið fyrir Rússum í framlengdum undanúrslitaleik á Ólympíuleikunum í Ríó í ágúst.

Útlitið var ekki bjart hjá norska liðinu í byrjun því Þórir Hergeirsson þurfti að taka leikhlé eftir aðeins fimm mínútur þegar staðan var orðin 4-0 fyrir Rússa. Norsku stelpurnar voru búnar að jafna í 8-8 eftir 18 mínútur en staðan var 11-11 í hálfleik.

Rússar voru 16-15 yfir eftir tíu mínútna leik í seinni hálfleik en þá kom flottur átta mínútna kafla hjá þeim norsku sem unnu hann 5-1 og komust þremur mörkum yfir, 20-17.

Silje Solberg stóð sig vel í norska markinu og var valin besti maður leiksins. Veronica Kristiansen og Nora Mörk voru markahæstar með fimm mörk hvor.

Dönsku stelpurnar lentu 3-0 undir í byrjun og voru fjórum mörkum undir í hálfleik, 17-13. Danska liðið jafnaði metin í 21-21 eftir þrettán mínútna leik í seinni hálfleik og náði síðan mest fimm marka mun, 31-26 þegar rúmar þrjár mínútur voru eftir.

Tékkar löguðu stöðuna aðeins á lokamínútunum en náðu ekki að ógna dönskum sigri að einhverju ráði. Stine Jorgensen skoraði átta mörk úr tíu skotum hjá Dönum og Anne Mette Hansen var með sex mörk.