Hundar í fullu starfi á Kleppi: „Dýrin róa mig niður“

Á Kleppsspítala mæta tveir hundar daglega til starfa. Þau Junior og Freyja fara í vinnuna með eigendum sínum á hverjum degi, en það eru tveir iðjuþjálfar sem sinna endurhæfingu sjúklinga á Iðjukaffi við Kleppspítala.

Hundar hafa verið stór hluti af endurhæfingu sjúklinga síðastliðin fimm ár en nú fyrir stuttu var pabbi Juniors verðlaunaður sem þjónustuhundur ársins, en Junior hefur tekið við hlutverki hans nú.



Hundarnir ná til fólks sem annars á erfitt með samskipti, hvetja til göngutúra og brjóta ísinn.

„Oft eiga þessir einstaklingar erfitt með félagsleg samskipti og spjall, þá spinnst alltaf umræða út frá hundinum. Eitthvað úr æsku, úr sveitinni, það geta allir alltaf talað um dýrin. Það er líka gott þegar þú ert að kljást við andleg veikindi að fókusinn sé ekki alltaf á þér, heldur fari fókusinn á dýrin,” segir Auður Hafsteinsdóttir, iðjuþjálfi og eigandi Freyju.



Og hundarnir eru sjálfir ánægðir með starfið enda fá þeir margfaldan skammt af athygli, knúsi og hreyfingu.



„Þeir elska þetta. Þá fáu daga sem mín fær ekki að koma með er hún alveg sorgmædd og horfir á mig vonsvikin,” segir Auður.



Ronja Von Jacobsen hefur tengst hundunum mikið í sinni meðferð. Hún segir þá róa hugann, minnka kvíða og fá hana til að brosa oftar.



„Af því að ég hef átt við félagsfælni að stríða þá finnst mér erfitt að vera innan um fólk en dýrin róa mig niður og taka manni eins og maður er, þannig að maður er ekki hræddur við viðbrögðin.“

Ronja segir hundana vera trausta vini sem dæma hana ekki og hugga á erfiðum tímum. Svo hafa þeir haft góð áhrif á samskipti hennar við annað fólk.





„Þeir hjálpa fólki að kynnast því maður byrjar að tala um viðbrögðin þeirra þegar maður mætir og umræða hefst um hundana. Ég hef alla vega kynnst fleira fólki út frá hundunum,” segir Ronja.



Sjá má úr heimsókn í Iðjukaffi á Kleppsspítala í spilaranum hér fyrir neðan.