Sigurður Ingi og Sigmundur hafa talað saman

Sigurður Ingi Jóhannsson, formaður Framsóknarflokksins, og Sigmundur Davíð Gunnlaugsson, fyrrverandi formaður flokksins, hafa átt í samskiptum síðustu daga, að því er greint er frá í Morgunblaðinu í dag.

Andað hefur köldu milli Sigurðar Inga og Sigmundar Davíðs eftir flokksþing Framsóknarflokksins sem haldið var dagana 1. og 2. október.  Sigurður Ingi sagðist, í samtali við RÚV, degi eftir að hann var kjörinn formaður að hann hefði sent Sigmundi Davíð skilaboð en engin svör fengið. Þá sagði hann í Forystusætinu á þriðjudag að þeir hefðu enn ekki rætt saman.

Sigurður Ingi segir í Morgunblaðinu að um sé að ræða trúnaðarsamtöl og muni hann því ekki gefa upp hvað fór þeim á milli. Næstu skref séu að halda kosningabaráttunni áfram og reyna að auka fylgi Framsóknarflokksins.