Fangar ilm Seyðisfjarðar og setur hann á flöskur

Listamaðurinn Philippe Clause flutti til Reykjavíkur frá heimaborg sinni, París, árið 2006. Sex árum síðar flutti hann aftur, þá til Seyðisfjarðar þar sem hann hefur búið síðan. Á Seyðisfirði rekur Philppe litla pop-up verslun og opna vinnustofu sem er starfrækt yfir sumartímann. Nýjasta verkefni hans er aftur á móti the Scent Bank þar sem hann reynir að fanga ilm Seyðisfjarðar í flöskur fyrir aðra til að njóta.

„Verkefnið gengur út á það að fanga ilminn úr firðinum: af sjónum, fjöllunum og nánasta umhverfi og setja á flöskur,“ útskýrir Philippe. Í sumar safnaði hann fjölda jurta sem hann hefur notað til eimingar og er afraksturinn ilmblanda sem hann nefnir Blær.

„Ilmurinn er ekki alveg tilbúinn. Þetta er verk í vinnslu. En það er hægt að kaupa prufur af Blæ í vinnustofu minni á Seyðisfirði sem fólk getur þá notað til að fríska upp á heimilið eða notað sem húð-mistur á sjálft sig. Prufurnar eiga að gefa fólki nasaþefinn af því sem koma skal,“ segir hann og hlær.

Hann tekur fram að hann taki því fagnandi þegar viðskiptavinir gefi honum álit sitt á ilminum eða komi með tillögur að „ilmi Seyðisfjarðar“ því svo víðtækt hugtak sé upplifunum háð.

Annar vinkill verkefnisins, segir hann, er að kanna hvernig rækta megi plöntur á sem sjálfbærastan hátt á stað þar sem engan jarðvarma er að finna.

„Mér fannst áhugavert að kanna hvernig rækta megi plöntur á sjálfbæran hátt í jafn miskunnarlausu umhverfi og þessu, þar sem er enginn jarðvarmi og vetur eru snjóþungir og dimmir. Ég hef verið að prófa mig áfram með rakatæki sem nærir rætur plantna með því að framleiða gufu, það hefur virkað ágætlega hingað til.“

Í vetur hyggst hann þróa verkefnið áfram og ætlar meðal annars að reyna að fanga ilminn af dýralífinu í firðinum. „Þetta er langt ferli sem tekur tíma að vinna. Í vetur ætla ég að kynna mér enn frekar ilmvatnsgerð, þróa Blæ áfram og safna prufum í næsta ilm,“ segir hann að lokum.