Sala á búrkíníi margfaldast

Sala á búrkíní hefur margfaldast eftir að bann var sett við slíkum fatnaði í Frakklandi á dögunum. Búrkíní er efnismikill sundfatnaður sem hylur nær allan líkamann.

Aheda Zanettei, hönnuður og eigandi vörumerkisins búrkíní, segir að netsala hafi aukist um 200 prósent á undanförnum dögum. Hún segist hafa fundið fyrir miklum áhuga á meðal fjölda kvenna, ekki einungis múslimskra.

Zanettei, sem er áströlsk, segir sundfötin endurspegla frelsi og heilbrigðan lífssstíl kvenna, öfugt við það sem stjórnvöld í Frakklandi hafi haldið fram. Sjálfri líði henni betur í búrkíníi en hinum hefðbundna sundfatnaði, líkt og dætrum hennar, sem fái val um það hvort þær klæðist bikiníi, búrkíníi, eða annars konar sundfötum.