Neymar og félagar slátruðu Hondúrum | Sjáðu mörkin

Neymar og Gabriel Jesus skoruðu tvö mörk hvor þegar Brasilía rústaði Hondúras, 6-0, í undanúrslitum fótboltakeppni karla á Ólympíuleikunum í Ríó.

Mörkin úr leiknum má sjá í spilaranum hér að ofan.

Brassar eru því komnir í úrslit á heimavelli þar sem þeir mæta annað hvort Nígeríu eða Þýskalandi sem mætast í kvöld.

Leikurinn var aðeins nokkurra sekúndna gamall þegar Neymar kom brasilíska liðinu yfir eftir slæm mistök í vörn Hondúra. Gabriel Jesus, sem Manchester City keypti á dögunum, bætti svo tveimur mörkum við í fyrri hálfleik.

Miðvörðurinn Marquinhos skoraði fjórða markið á 51. mínútu og 11 mínútum fyrir leikslok bætti Luan því fimmta við.

Neymar rak svo síðasta naglann í kistu Hondúra þegar hann skoraði úr vítaspyrnu í uppbótartíma. Lokatölur 6-0, Brasilíu í vil.

Eftir markalaus jafntefli í fyrstu tveimur leikjunum í riðlakeppninni hafa Brassar nú unnið þrjá leiki í röð með markatölunni 12-0.