Godín tryggði Atlético sigur á Tottenham

Atlético Madríd vann 1-0 sigur á Tottenham í leik liðanna í International Champions Cup-æfingamótinu í fótbolta í morgun en leikurinn fór fram í Melbourne í Ástralíu.

Úrúgvæski varnarjaxlinn Diego Godín skoraði eina mark leiksins fyrir Atlético á 40. mínútu en Tottenham er nú búið að tapa báðum leikjum sínum í mótinu.

Lundúnarliðið tapaði 2-1 fyrir Juventus í fyrsta leiknum en þessi þrjú lið ásamt því ástralska Melbourne Victory spila í þeim hluta ICC-mótsins sem fram fer í Ástralíu.

Victor Wanyama spilaði fyrir Tottenham í dag en hann kom í sumar frá Southampton og þá spilaði hollenski framherjinn Vincent Janssen annan leikinn sinn eftir komuna frá AZ.