Ólafur vill fá Hannes til Randers

Ólafur Kristjánsson, nýráðinn þjálfari Randers, vill fá landsliðsmarkvörðinn Hannes Þór Halldórsson til danska liðsins.

Hannes er samningsbundinn hollenska liðinu NEC Nijmegen en hefur leikið sem lánsmaður með Bodø/Glimt í Noregi frá því í mars. Lánssamningur Hannesar við norska liðið rennur út á mánudaginn.

Randers er eitt þeirra liða sem hefur áhuga á landsliðsmarkverðinum en þetta staðfestir Danny Hoekman, íþróttastjóri Nijmegen, í samtali við Tipsbladet í Danmörku.

Sjá einnig: Hannes einn af þeim sem UEFA telur að hafi breytt lífi sínu á EM í Frakklandi

Randers er í markvarðaleit en liðið sækir Midtjylland heim í 1. umferð dönsku úrvalsdeildarinnar á mánudaginn.

Hannes vakti mikla athygli fyrir frammistöðu sína með íslenska landsliðinu á EM í Frakklandi. Hannes lék hverja einustu mínútu á mótinu en enginn markvörður varði fleiri skot en hann á EM.