Íslendingalið í fimm efstu sætunum í sænsku deildinni

Það er gott að vera Íslending í sínu liði í sænsku úrvalsdeildinni í fótbolta ef marka má stöðu efstu liða í deildinni í dag.

Átta umferðir eru búnar að Allsvenskan 2016 og fimm efstu liðin eiga það öll sameiginlegt að hafa íslenskan leikmann innan sinna raða.

Þrjú efstu liðin og fjögur af þessum fimm eru ekki aðeins með einn Íslending heldur tvo.

Norrköping er ríkjandi sænskur meistari og á toppnum í dag en með liðinu spila þeir Arnór Ingvi Traustason og Jón Guðni Fjóluson.

Arnór Ingvi Traustason sem spilaði stórt hlutverk þegar liðið vann titilinn í fyrra en er væntanlega á leiðinni frá félaginu eftir Evrópumótið í sumar.

Það fylgir reyndar sögunni að það eru fjórtán íslenskir leikmenn í sænsku úrvalsdeildinni go átta af sextán liðum hennar hafa Íslending innan sinna raða.

Íslensku leikmennirnir hafa skorað 11 mörk í fyrstu átta umferðunum og það eru bara sænskir leikmenn sem hafa skorað meira. Rúnar Már Sigurjónsson er markahæstur íslensku leikmannanna en Viðar Örn Kjartansson kemur næstur með þrjú mörk.



Stig efstu liða í sænsku deildinni í fyrstu átta umferðunum

1. sæti IFK Norrköping 18 stig

(Arnór Ingvi Traustason og Jón Guðni Fjóluson)

2. Malmö FF 15

(Kári Árnason og Viðar Örn Kjartansson)

3. GIF Sundsvall 15

(Rúnar Már Sigurjónsson og Kristinn Steindórsson)

4. Örebro SK 15

(Hjörtur Logi Valgarðsson)

5. IFK Göteborg 14

(Hjálmar Jónsson og Hjörtur Hermannsson)



- Hin Íslendingaliðin -

9. AIK Solna 12

(Haukur Heiðar Hauksson)

11. Östersunds FK 11

(Haraldur Björnsson)

12. Hammarby IF 9

(Arnór Smárason, Birkir Már Sævarsson og Ögmundur Kristinsson)