Kvöldfréttir Stöðvar 2 í beinni

Ungt fólk sem á enga sögu um eiturlyfjaneyslu er í auknum mæli farið að nota LSD. Lögreglan hefur miklar áhyggjur af þróuninni en í fréttum Stöðvar 2 verður rætt við Runólf Þórhallsson yfirmann hjá fíkniefnadeild um málið.

Þá verður í fréttatímanum fjallað um raforkusæstreng Norður-Atlantshafsríkja sem myndi tengja Ísland, Grænland, Færeyjar og Hjaltlandseyjar við raforkukerfi Evrópu. Um er að ræða nýja og annars konar hugmynd en hingað til hefur aðallega verið hoft til þess nýr raforkusæstrengur frá Íslandi myndi tengjast Skotlandi.

Hugmyndin að hönnun strengsins er afrakstur vinnu samstarfshóps fimm þjóða. Við fjöllum líka um mannskæðar skotárásir í Bandaríkjunum en það sem af er ári hafa tæplega fjögur þúsund manns verið skotnir til bana Vestanhafs.

Í fréttatímanum verður umfjöllun um nýtt hótel á Hnappavöllum. Hundrað og fjögur herbergi og fjórar svítur verða á hótelinu sem mun skapa fimmtíu ný störf í Öræfasveit. Þá lítum við inn á útskriftarsýningu BA-nema í myndlistardeild Listaháskóla Íslands, svo eitthvað sé nefnt.

Kvöldfréttir Stöðvar 2 hefjast klukkan 18:30 á samtengdum rásum Stöðvar 2 og Bylgjunnar og í beinni útsendingu á fréttavefnum Vísi. Sjá má útsendinguna í spilaranum hér fyrir ofan.