Hnífsstunga á stúdentagörðum: Ungi maðurinn útskrifaður af gjörgæslu

Ungi maðurinn sem ráðist var á fyrir utan stúdentaíbúðir við Sæmundargötu aðfaranótt sunnudagsins 6. mars var í síðustu viku útskrifaður af gjörgæsludeild Landspítala.

Maðurinn, sem er á þrítugsaldri, var í lífshættu þegar hann var fluttur á slysadeild eftir árásina en hann var með stungusár neðarlega á baki sem olli rispu á lunga sem fór djúpt inn í lifrina. Gekkst hann undir aðgerð og var í framhaldinu sofandi í öndunarvél.

Árásarmaðurinn er enn í gæsluvarðhaldi á grundvelli almannahagsmuna og verður þar að óbreyttu til 6. apríl. Hann er undir sterkum grun um tilraun til manndráps eða sérstaklega hættulega líkamsárás að því er fram kom í gæsluvarðhaldsúrskurðinum yfir honum fyrr í mánuðinum.