Aron: Væri veisla að vinna Eið Smára

Aron Sigurðarson hélt í morgun utan til Noregs en það styttist í að keppnistímabilið hefjist þar. Aron samdi nú fyrr í vetur við Tromsö sem mætir einmitt Noregsmeisturum Molde í fyrstu umferðinni þann 13. mars.

Eiður Smári Guðjohnsen gekk til liðs við Molde á dögunum og neitar Aron því ekki í samtali við Arnar Björnsson að það væri gaman að fá að taka aðeins á honum.

Sjá einnig: Aron fór á kostum í fyrsta leik með Tromsö

„Það væri veisla að vinna hann. Ég fékk að spila með honum í landsliðinu um daginn og það væri gaman að mæta honum. Það væri ekki leiðinlegt að lenda í einhverju samstuði við hann,“ sagði Aron og brosti en viðtalið má sjá í heild sinni hér fyrir ofan.

Aron hefur slegið í gegn með Fjölni í Pepsi-deildinni og skorað mörg stórbrotin mörk, líkt og hann sýndi þegar hann skoraði glæsilegt mark gegn Bandaríkjunum í hans fyrsta landsleik.

Sjá einnig: Aron Sig: Vildi að pabbi hefði séð fyrsta landsleikinn

En Aron veit að til þess að ná lengra og spila í stærstu deildum Evrópu þarf hann að bæta sig.

„Ég þarf að bæta stöðugleikann. Ég þarf að vera góður í hverjum einasta leik. Ekki bara öðrum hverjum leik eða þriðja hverjum. Ég þarf að skora fleiri mörk og leggja fleiri upp,“ sagði Aron.