Ísland verður að vera búið undir það versta

Rétt rúmur mánuður var liðinn frá hryðjuverkaárásunum á Charlie Hebdo í París þegar skotárásir voru gerðar í Kaupmannahöfn í febrúar í fyrra. Einn var að verki og tveir létu lífið.

Bráðalæknirinn Peter Anthony Berlac er yfirlæknir utanspítalaþjónustu í Kaupmannahöfn og stýrði útkallsmiðstöð bráðahjálpar í skotárásunum. Hann fjallaði um reynsluna út frá sjónarhóli danska heilbrigðiskerfisins á bráðadögum Landspítalans í dag.

Voru heppin að ekki fór verr

„Ég held að við höfum verið afar heppin að við urðum ekki verr úti í þetta skiptið, því þótt það hafi orðið mannfall voru ekki svo margir sem særðust. Ég held að við höfum staðist prófið þarna, en það þýðir ekki að við verðum tilbúin næst."

Allt frá 2009 hafa sameiginlegar stórslysa- og hryðjverkaæfingar viðbragðsaðila verið haldnar í Danmörku. Berlac segir að þrátt fyrir það hafi aðstæður skapast í árásunum sem hefðu getað ógnað öryggi heilbrigðisstarfsmanna, vegna samskiptaörðugleika við lögreglu.

Þannig hafi viðbragðsflýtir sjúkraflutningamanna verið svo mikill að þeir voru komnir á staðinn í seinni skotárásinni á undan sérsveit lögreglunnar og fengu misvísandi upplýsingar um hvort búið væri að tryggja vettvanginn.

„Þetta var allt öðru vísi en allt það sem við höfðum æft og unnið greiningarvinnu um áður," sagði Berlac í samtali við fréttastofu.

Gæti orðið Íslandi ofviða

Mikil vinna hefur farið fram í Danmörku við að skoða viðbragðskerfi nágrannalandanna við hryðjuverkum og draga af þeim lærdóm. Berlac segir mikilvægt að á öllum stigum kerfisins fari fram æfingar og andlegur undirbúningur, jafnvel fyrir atburðum sem kunni að virðast óhugsandi.

„Og það sem Ísland þarf kannski sérstaklega að hafa í huga er áætlun um hvernig hægt væri að fá hjálp að utan. Því ef meiriháttar atburður verður hér þá yrði það ykkur sennilega ofviða, svo þið verðið líka að hugsa um utanaðkomandi hjálp. Það versta sem þið getið gert er að stinga höfðinu í sandinn og segja að ekkert muni gerast hér í Norður-Atlantshafinu. Þið verðið að vera búin undir það versta. Og þegar þið hafið hugsað þetta sem kerfi, þá hafið þið líka æft samskiptaleiðir og samvinnu við önnur yfirvöld í ykkar eigin kerfi."